Jamoada yo tarkib, yoki murabbiy kuchli bo‘lishi lozim. Bordi-yu murabbiy o‘rtamiyona bo‘lib, tarkib kuchli bo‘lsa, aynan tarkibning kuchi bilan natijaga erishish mumkin. Bordiyu tarkib kuchsiz bo‘lsa, unda tajribali murabbiy zarur. Toki murabbiyning tajribasi tarkibning ham tajribali bo‘lishiga imkon yaratadi. Agar tarkib ham, murabbiy ham kuchsiz bo‘lsa, bu chinakam fojia.
“MILAN” MUAMMOSI
“Milan” klubi ayni damda biz yuqorida ta’kidlagan vaziyatda turibdi. Ochig‘i, 7 turdan keyin 9 ochko to‘plash va turnir jadvalida 13-o‘rinda turish “Milan”ga yarashmaydi. Ammo hozirgi holatda boshqa narsa kutish qiyin.
Har qanday klub avlodlar almashinuvini boshdan kechiradi. Qaysidir klub ana shu jarayonda pastga sho‘ng‘iydi, qaysidir jamoa esa o‘rnini saqlab qoladi. Gap avlodlar almashinuvi jarayonida emas, gap shu jarayondan qanday o‘tishda.
“Milan” tarkibni yoshartirayotganda jamoaga tajribali murabbiyni, aniqrog‘i, yosh futbolchilardagi iqtidorni ko‘ra bilish, ularga kerakli taktikalarni o‘rgata olish, yoshlar bilan ishlash mahoratiga ega murabbiyni olib kelishi kerak edi. Ana shunda tajribasiz futbolchilar tajribali murabbiy qo‘l ostida “Milan”ning poydevoriga aylangandi.
2014 YILDAGI XATO
Aslida, “Milan” rahbariyatining xatosi 2014 yilda boshlangandi. O‘shanda so‘nggi paytlarda ketmoni uchmay qolgan Massimiliano Allegri iste’foga chiqarilgandi. O‘rniga esa tajribali murabbiy kelishi kerak edi, albatta. “Milan” esa tavakkalga qo‘l urdi. “Men qoyillataman, ishonavering”, degan Klarens Zeedorf bosh murabbiylikka olib kelindi. “Milan”da o‘ynagan sobiq futbolchi esa jamoani g‘alabalar sari yetaklay olmadi. Tajribasizlik, baribir, pand berdi.
XATO KETIDAN XATOLAR
Afsuski, bu boradagi xato shu bilan to‘xtab qolgani yo‘q. Zeedorf oldida tajribaliroqdek ko‘ringan Sinisha Mixaylovich jamoaga olib kelindi. Biroq “Milan” uchun, yangilanayotgan tarkib uchun Mixaylovich tajribasizlik qildi. 2015 yilda kelgan Sinisha 2016 yilda iste’foga chiqdi.
Undan keyingi murabbiylar: Vinchenso Montella hamda Jennaro Gattuzo ham “Milan” uchun munosib murabbiy bo‘la olishmadi. Montelladan keyin “Milan”ga yosh, shijoatli futbolchilarni “odam qiladigan” Klopp kabi mutaxassis kerak edi. Gattuzoda ishtiyoq bor edi, ammo tajriba, baribir, tajriba. Tajribasiz murabbiy boshqaruvida qolgan yosh, tajribasiz futbolchilar hech narsani qoyillata olishmadi.
Ma’lumotlarga ko‘ra, Gattuzoning o‘rniga kelgan Marko Jampaolo ham iste’foga chiqarilgan. Uning o‘rniga kim kelishi esa noma’lum. Ma’lumi shuki, hozirgi beqaror va pala-partish tarkibni munosib tarzda tartibga sola oladigan, “Milan”ga qanday futbolchilar kerak ekanligini biladigan hamda taktika borasida qashshoq bo‘lmagan murabbiy kerak.
So‘nggi besh yil “Milan” uchun boy berilgan davr bo‘ldi. Ayni damda ana shu 5 yillikning asorati — beqaror tarkib, mazmunsiz o‘yin, qoniqarsiz natijalar. Ammo hali kech emas. “Milan” rahbariyati tajribali murabbiy olib kelib, uning talablarini bajara olsagina biz o‘sha afsonaviy “Milan”ning ajoyib o‘yinlarini tomosha qilish imkoniga ega bo‘lamiz.
Paxtakor
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
