O‘zbekiston Professional futbol ligasi (O‘zPFL) qaroriga ko‘ra,barcha futbol musobaqalari 15 avgustgacha qoldirildi. Bungacha Coca Cola Superliganing 1-davraning so‘nggi 4ta tur bahslari markazlashgan holda, Toshkentda o‘tkazilishi e’lon qilingandi. Bundan tashqari, 23 iyul kuni Coca Cola O‘zbekiston kubogining guruh bosqichi bahslariga qur’a tashlanib, unga ko‘ra, Namanganning “Navbahor” klubi “A” guruhidan joy olgan holda, o‘z maydonida “Metallurg”ni qabul qilib, safarda “Andijon” hamda AGMK jamoalariga qarshi maydonga tushadigan bo‘ldi.
Biz “lochinlar”ning tajribali yarim himoyachisi va sardori Azimjon Ahmedovdan mazkur masalalar bo‘yicha intervyu oldik.
— O‘zPFL qaroriga ko‘ra, 15 avgustgacha yurtimizda barcha futbol musobaqalari to‘xtatildi. Bunga qanday munosabat bildirasiz?
— O‘zingizga ma’lum, mamlakatimizda karantin talablari 15 avgustgacha uzaytirildi. PFL ham O‘zbekiston futbol assosiasiyasi (O‘FA)ning tavsiya xati, shuningdek, mavjud holat, qolaversa, futbolchi va murabbiylar bilan bog‘liq sharoitlar, mamlakatimizda hukm surayotgan karantin davri hamda undagi murakkabliklarni inobatga olgan holda, shunday qarorga kelganligi, barcha uchun sog‘liq birinchi o‘rinda ekanligini o‘z xabarida ta’kidlab o‘tdi.
Men ham ushbu qarorni ma’qullayman. Chunki Superliganing ko‘plab klublaridagi futbolchilar koronavirusga chalinishdi. Hattoki, ”Surxon” jamoasining 15 nafar o‘yinchisi koronavirusga chalinganligi e’lon qilindi. Bunday sharoitda esa futbol bahslarini o‘tkazish boshqalarga ham xavf tug‘dirishi ehtimoldan xoli emas.
Axir, futbolchilarning sog‘liqlari barcha narsadan ustun! Umid qilamanki, 15 avgustga qadar koronavirusga chalingan barcha o‘yinchilar shifo topishadi hamda futbol yana davom ettiriladi.
— Birinchi davraning so‘nggi 4ta tur bahslari markazlashgan holda, Toshkentda o‘tkazilishi rejalashtirilayotgandi. Bu borada fikringiz qanday?
— PFL rahbariyati barcha qarorlarni jamoalarga oson bo‘lishi uchun chiqaradi. Ushbu qaror ham ayni paytdagi pandemiya va karantin sharoitidan kelib chiqib, qabul qilingandi, menimcha. Ayni paytda pandemiya sababli, baribir Superliga o‘yinlari muxlislarsiz o‘tkazilyapti. Shunday ekan, menimcha, jamoalarga qayerda o‘ynashning farqi yo‘q. Restartdan keyingi bahslarda “Navbahor” ishqibozlarsiz ham munosib o‘ynay olishini isbotladi. Shu bois, PFLning har qanday qarorini hurmat qilamiz hamda musobaqani qanday va qayerda davom ettirishni lozim topsa, Superliga bahslarini shunday tarzda davom ettiramiz.
— Final bahsi Namanganda o‘tkaziladigan O‘zbekiston kubogining “Navbahor”ga guruh bosqichida raqib bo‘ladigan jamoalar borasida nima deya olasiz?
— “Metallurg” va AGMK klublari ayni paytda Superliga o‘yinlarini ham yaxshi o‘tkazishmoqda. Shuning uchun ushbu jamoalarga qarshi kechadigan bahslarning keskin kurashlar ostida o‘tishi aniq. “Andijon”ga qarshi kechadigan o‘yinlar esa o‘zingizga ma’lum, “vodiy derbisi” maqomida bo‘ladi hamda bunday uchrashuvlar jamoalar qaysi o‘rinni egallab turganligidan qat’iy nazar, doimo shiddatli tarzda kechgan. Shu bois, bemalol “Navbahor” kuchli guruhdan joy oldi, deya olaman. Ammo joriy mavsumda o‘z oldimizga yuksak maqsadlar qo‘yganmiz, ya’ni Osiyo Chempionlar Ligasi yo‘llanmasini qo‘lga kiritishni niyat qilganmiz. Shunday ekan, buni amalga oshirish uchun bor mahoratimizni ishga solamiz. O‘zbekiston kubogini qo‘lga kiritsak, shunday imkoniyatga ega bo‘lamiz. Bundan tashqari, ta’kidlaganingizdek, kubok finali bahsi Namanganda o‘tkaziladi. Shunday ekan, ushbu imkoniyatdan unumli foydalangan holda, billur sovrinni qo‘lga kiritib, muxlislarga quvonch ulashish niyatidamiz.
Jamoamizning ayni paytdagi tarkibi buni amalga oshirishga qodir. Xudo xohlasa, final o‘yiniga yetib olsak, ungacha pandemiya davri ham yakunlanib, muxlislarning stadionlarga qaytishlariga ham ruxsat berilsa, o‘z maydonimizda bo‘lib o‘tadigan O‘zbekiston kubogining hal qiluvchi o‘yinida o‘zgacha anshlag yuzaga kelishiga shubham yo‘q. Biz esa bundan foydalanishga harakat qilamiz hamda uzoq tanaffusdan keyin yana O‘zbekiston kubogi sohibiga aylanamiz, degan umiddaman.
So‘zim yakunida fursatdan foydalangan holda, barcha muxlislarni kirib kelayotgan Qurbon hayiti bilan tabriklab, ularga uzoq umr, sihat-salomatlik, oilaviy baxt tilayman.
Ilohim, koronavirus balosi yurtimizdan tezroq daf bo‘lsin! Baxtimizga barcha muxlislar sog‘ bo‘lishsin!
“Navbahor” PFK matbuot xizmati.
Qo‘qon-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
