«O‘zbekcha duel» yo‘q...
Janubiy Koreya «K»-ligasi 5-turida tarkibida Rustam Ashurmatov o‘ynayotgan «Kanvon» o‘z maydonida Jamshid Iskanderovning klubi - «Seongnam»ga qarshi bahs olib borib, 0:0 hisobiga ko‘ndi. Ashurmatov mezbonlar himoyasida to‘liq 90 daqiqa harakatlanib, sariq kartochka olgan bo‘lsa, Iskanderov «Seongnam» qaydnomasiga kiritilmadi. «Kanvon» keyingi turda «Inchxon Yunayted»ni 2:0 hisobida yengdi. Rustam Ashurmatov bu safar ham 90 daqiqa faol to‘p surdi. Xususan, 20-daqiqada aynan hamyurtimiz burchakdan oshirilgan to‘pni boshi bilan darvozaga yo‘llab, hisobni ochdi. «Seongnam» ham 6-turda g‘alaba nashidasini surdi. Jamshid Iskanderov «Poxang Stilers» bilan o‘yin (2:1)ning 84-daqiqasida maydonga tushdi. «Seul» yarim himoyachisi Ikrom Aliboyev jarrohlik amaliyotidan keyin nihoyat, sekin-asta mashg‘ulotga qaytmoqda. Ikrom hozircha sport zalida yakka tartibda shug‘ullanmoqda.
Amaliyot yaxshi, natijachi?
«Ufa» RPL 23-turidan o‘rin olgan uchrashuvni o‘z maydonida «Lokomotiv»ga qarshi o‘tkazib, minimal hisobda yengildi. «Temiryo‘lchilar» g‘alaba golini 80-daqiqada nishonlashdi. Boshqirdiston jamoasiga ijara kelishuvi asosida qaytgan yarim himoyachi Oston O‘runov bu uchrashuvda to‘liq 90 daqiqa harakatlandi. «Ufa» ayni payt 14 ochko bilan turnir jadvalining 15-pog‘onasini band etib turibdi. Rossiya quyi divizionidagi legionerlarimizga kelsak, «Tekstilshik» - «Nefteximik» o‘yini (0:1)da mehmonlar vakili Vagiz Galiulin 88-daqiqa to‘p surdi, Bobur Davlatov esa zaxirada qoldi. «Tom» himoyachisi Vitaliy Denisov «Fakel»ga qarshi kechgan omadsiz o‘yin (0:3)da 61-daqiqagacha maydonda harakatlandi.
«Jenoa»da irodali g‘alaba, faqat...
Italiya «A» seriyasi 28-turidan o‘rin olgan «Parma» - «Jenoa» bahsida mehmonlar irodali g‘alabani tantana qilishdi, faqat hamyurtimiz Eldor Shomurodov ishtirokisiz. To‘g‘ri, milliy jamoamiz hujumchisi Genuya klubi boshlang‘ich tarkibidan joy oldi, biroq tanaffusda o‘z o‘rnini Janluka Skamakkaga bo‘shatib berdi. Ikkinchi bo‘limda aynan shu futbolchi «dubl» qayd etib, «Jenoa»ga 3 ochko taqdim etdi - 2:1.
Sergeev gollari hisobini ochdi.
«Aktobe» safiga qo‘shilgan Igor Sergeev Qozog‘iston Premer-ligasi 2-turida chempionatdagi gollari hisobini ochdi. U «Aktobe» - «Tobol» uchrashuvining 54-daqiqasida raqib darvozasini bosh bilan yo‘llangan chiroyli zarba bilan ishg‘ol qildi. Biroq uning jamoasi yakunda 1:1 hisobi bilan kifoyalandi. Igor bu uchrashuvda to‘liq 90 daqiqa harakatlandi.
Ubaydullayev boshlang‘ich tarkibda. Belarus chempioni - «Shaxtyor» mamlakat chempionati 2-turida «Energetik-BGU» mehmoni bo‘lib, ortga 2:1 hisobidagi g‘alaba bilan qaytdi. Soligorsk klubi safidagi hujumchimiz Shahzod Ubaydullayev bu safar boshlang‘ich tarkibda maydonga tushib, 56-daqiqagacha chakki taassurot qoldirmadi. Deylik, «Shaxtyor» har ikki golini hamyurtimiz maydonda bo‘lgan vaqtda urdi. «Dinamo Brest» - BATE uchrashuvida hisob ochilmadi. Uchrashuvda 83-daqiqagacha to‘p surgan mehmon jamoa yarim himoyachisi Shahboz Umarov sariq kartochka olgani bilan qaydnomaga kirdi.
BAA chempionatida nima gap?
Doston Hamdamovning klubi - «Xatta» BAA elit ligasi 22-turida «Bani Yas» maydonida yagona gol tufayli mag‘lubiyatni tan oldi. Hamyurtimiz ushbu omadsiz uchrashuvda 69-daqiqagacha maydonda bo‘ldi. «Sharja» esa Otabek Shukurov to‘liq 90 daqiqa o‘ynagan bahsda mag‘lubiyatdan zo‘rg‘a qutulib qoldi. «Al-Vasl» bilan o‘yin gollarga boy bo‘lib, 3:3 hisobida yakunlandi. «Shabab Al-Ahli» ham safarda o‘ynadi, farqli tomoni, Odil Hamrobekov va Jaloliddin Masharipovning jamoasi «Al-Dafra»ni 2:1 hisobida yengdi. Odil Hamrobekov bu o‘yinda 64-daqiqagacha harakatlangan bo‘lsa, Jaloliddin Masharipov 90-daqiqada zaxiraga olindi - taktik o‘zgarish. «Shabab Al-Ahli» shu bilan ochkolari sonini 40taga yetkazib, turnir jadvalida 3-o‘ringa ko‘tarildi.
Tailandda g‘alaba goli.
Tailand chempionati 29-turidan o‘rin olgan «Supxanburi» - «Muangtong Yunayted» o‘yini 1:2 hisobida tugadi. Mehmonlarga g‘alaba keltirgan gol 90+1-daqiqada Sardor Mirzayev tomonidan urildi. U uchrashuvni boshlang‘ich tarkibda boshlagandi.
Yaxshiboyevda jarohat bor.
Polsha chempionati yetakchisi «Legiya»ga yo‘l olgan Jasur Yaxshiboyev hozircha jarohat tufayli maydonga tushayotgani yo‘q. Shuningdek, «Rux» hujumchisi Bobur Abduxoliqov Ukraina chempionati 19-turidan o‘rin olgan «Dinamo»ga qarshi safar o‘yini qaydnomasiga kiritilmadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
