9 avgust kuni «Roma» futbolchisi sifatida keng ommaga tanishtirilgan Jorjinyo Veynaldum Rimda mukammal yarim himoyachi qiyofasiga kirishdan umidvor.
Niderlandiyalik futbolchi «Trigoriya»da jurnalistlari bilan suhbatda APL va Liga 1dagi faoliyatdan keyin «A» seriyaga katta maqsadlarni ko‘zlagan holda yuzlanganini aytib, «bo‘rilar» safida ideal o‘yin ko‘rsatishga va’da berdi.
- Jorjinyo, hozir o‘zingizni qanday his qilyapsiz? Har holda, avvalgi mavsum talab darajasida o‘yin amaliyotga ega bo‘lmadingiz, boz ustiga, o‘rtoqlik uchrashuvlarida ham yetarlicha qatnashmadingiz. Umuman, «A» seriya startiga nechog‘li tayyorsiz?
- Ha, to‘g‘ri ta’kidladingiz, mavsumoldi yig‘ini men uchun boshqacha bo‘ldi, har doim faol ishlashga o‘rgangan edim. Lekin nolimayman - «PSJ»ning umumiy guruhida shug‘ullanib, o‘zimni imkon qadar hozirlashga harakat qildim. Shuningdek, mashg‘ulotlardan tashqari, fizioterapevtlar bilan ham alohida, individual ravishda ish olib bordik. Ruhiy tayyorgarlik masalasida muammo yo‘q, faqat jismonan tiklanish qandaydigini aniqlash qoldi. Tabiiyki, bu borada yakuniy xulosani murabbiy chiqaradi.
- Yurgen Klopp vaqtida sizni kelajagi mukammal markaziy yarim himoyachi sifatida maqtagandi. Bunga nima deysiz?
- O‘zi mukammal yarim himoyachi qanday bo‘ladi? Bu borada muayyan kriteriyalar bormi? Aytish qiyin. O‘ylashimcha, «Liverpul»da jamoa o‘yin uslubiga mos tushganman, Klopp shunga muvofiq, mukammallik haqida gapirgandir. Lekin unutmaslik kerak, boshqa klublarda qiyinchilik seziladi. Axir o‘zgacha uslub, o‘zgacha futbol... Shunday ekan, mukammal yarim himoyachi sifati nisbiy, bu borada har kim o‘z fikriga ega. To‘g‘ri, Yurgen Kloppdek murabbiydan shunday ta’rif eshitish juda yoqimli. Yana nima derdim, «Roma» uchun ham mukammal yarim himoyachi bo‘lishdan umidvorman, bu yo‘lda bor kuchimni sarflashim tayin.
- «Roma» bosh direktorining aytishicha, «bo‘rilar» safini to‘ldirish ishqida yonibsiz, go‘yo. Qiziq, asosiy sabab nima? «A» seriya saviya bo‘yicha boshqa ligalardan pastroq emasmi?
- Birinchi navbatda, klub meni o‘z tomoniga og‘dirish uchun jiddiy harakat qildi va bu tanlovimda katta rol o‘ynadi. Bundan tashqari, Muhammad Saloh va Kevin Strotman bilan ham «Roma», ham Rim haqida gaplashdim. Ulardan faqat yaxshi ta’rif eshitdim. Yana Ashraf Hakimidan ham maslahat so‘radim, garchi u «Inter»da o‘ynagan bo‘lsa-da. Ashraf darhol qat’iy ohangda ta’kidladi: «Ajoyib klub va shunday shahar. U yerda baxtiyorlikni sezasan, albatta». Umuman, «Roma»ni oldindan qisman bilardim, deylik, «Liverpul» safida bu klubga qarshi ikki marta o‘ynaganmiz. O‘shandayoq «Olimpiko»dagi muhit «Enfild»nikidan qolishmasligiga ishonch hosil qilganman. Qisqasi, «Roma»ning beqiyos muhitda ajoyib muxlislar ko‘z o‘ngida o‘ynashidan xabardorman. Lekin menga eng katta ta’sir ko‘rsatgan jihat - bu klubning janob Pinto va murabbiy orqali shartnoma tuzish uchun qancha kuch sarflagani. Ilk uchrashuvdayoq meni «Roma» libosida ko‘rishni chin yurakdan xohlashayotgani va bu yerda qadrlanishimni yaqqol his qildim. Natijada bir to‘xtamga kelishda aytarli ikkilanganim yo‘q. «A» seriya saviyasiga kelsak, liganing boshqalardan bir qadam orqa yoki oldinda ekanligini aytishim qiyin. Axir bu yerda o‘ynab ko‘rmaganman. Hozirgacha bir qator ligalar bilan tanishdim va fikrimcha, ular orasida eng raqobatbardoshi - APL.
- «Roma»ga qo‘l keladigan eng qimmatli fazilatingizni ayta olasizmi? O‘z navbatida, klub sizga qanday yordam berishi mumkin?
- Birinchi navbatda, yaxshi ijrochilarga ega jamoa safiga qo‘shildim. Yuqorida mukammal yarim himoyachi bo‘lish-bo‘lmaslik aynan jamoaga bog‘liqligini ta’kidladim. O‘ylaymanki, «Roma» qanday o‘ynashni xohlasa, ham hujumga o‘tish, ham himoyalanishga qodir yarim himoyachilar guruhini shakllantirsa, jamoaga talab darajasida yordam bera olaman. Har holda, o‘yinchilik sifatlarim evaziga ham hujum, ham himoyaga munosib hissa qo‘shishim mumkin. Zero, hujum boshlashni yoqtiraman, orqada ishlashga ham moyilman. Faqat jarohatlar pand bermasa, bas. Shunda yetarli miqdorda o‘yinlarda qatnashib, jamoa muvaffaqiyatiga hissa qo‘shish imkoniyatim oshadi.
- Mundial tufayli joriy mavsum o‘zgacha o‘tadi. Murabbiy bilan bo‘lajak jahon chempionatiga qanday hozirlanish haqida gaplashib oldingizmi?
- Mavsumni yaxshi boshlash juda muhim. Lekin undan-da muhimi - tobora yaxshi sport formasiga kirib borish. Albatta, taqvim zich, mavsum davomida turli murakkabliklar yuzaga keladi - o‘yinlarda g‘alaba qozonasiz, yutqazasiz, sust harakatlanasiz, jarohatlanasiz, uslubni o‘zgartirishga ehtiyoj seziladi. Mavsum o‘rtasida mundialga navbat berilishi ham barchasini yanada qiyinlashtiradi. Menimcha, barqaror natija qayd etish va jamoa sifatida rivojlanish uchun ikki hissa ko‘p ishlash talab etiladi. Lekin bu imkonsiz emas. Xullas, yaxshi boshlash va imkon qadar tezroq moslashish muhimdir. Mourinyo menga yuborgan birinchi xabarida Rimda o‘ynashga intilganim uchun minnatdorchilik izhor etdi. Keyin yuzma-yuz o‘tirib, futbol haqida atroflicha gaplashdik. Jozening qanday murabbiy ekanligi uning turli rekordlaridan ma’lum. Mourinyoning futboldagi ishlari, qo‘lga kiritgan sovrinlari va boshqargan klublari... Buni birdan aqlga sig‘dirish mushkul. Menimcha, har qanday futbolchi shunday mutaxassis bilan ishlashni xohlaydi. U bilan gaplashganimdan so‘ng chindan ham, «Roma» safiga qo‘shilishni xohlayotganimni teran angladim, to‘g‘ri, bunga qadar ham qandaydir shubham yo‘q edi.
- «Olimpiko»dagi qabul marosimi qanday taassurot qoldirdi? Klubdagi ilk kunlardan yetarlicha zavq oldingizmi?
- Muhitga gap yo‘q, haqiqatan o‘zgacha marosim. Barchasi xuddi shunday tasavvur qilgandim, chunki bu yerda «Liverpul» bilan CHL bahsida maydonga tushganman. Hattoki, bunday e’tibordan biroz xijolat tortasiz, lekin muxlislarning siz uchun shunday qabul uyushtirishlari o‘ta yoqimli va hayratlanarli, albatta. Endi bunga munosib javob qaytarish kerak.
M.PO‘LATOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
