Tarkibida hamyurtlarimiz Bobur Abduxoliqov va Shahboz Umarovni jamlagan Shimkent jamoasi Qozog‘iston Premyer-ligasi 1-turida «Kaspiy»ni qabul qilib, 3:1 hisobida ustun keldi. E’tiborlisi, maydonda to‘liq vaqt to‘p surgan Bobur qozoq ligasidagi debyutini gol bilan bezadi. U 66-daqiqada «Ordabasi»ning 3-goliga mualliflik qildi. Shahboz esa maydonda ko‘rinish bermadi. Shuningdek, «Tobol» ham startda aynan 3:1 hisobida g‘alaba qozondi. Kostanay klubi hujumchisi Igor Sergeev «Aksu»ga qarshi kechgan uy uchrashuvida 68-daqiqaga qadar faol harakatlandi.
Turkiya.
Superliga 24-turidan o‘rin olgan «Fotih Qoragyumryuk» - «Sivasspor» o‘yinida naq 7ta gol qayd etildi - 4:3. Mezbon jamoa yarim himoyachisi Otabek Shukurov bu safar atigi 77-daqiqada zaxiradan safga qo‘shildi. «Fotih» safida Mbaye Diane «xet-trik»ka erishganini ham aytish o‘rinli.
Rossiya.
Ibrohimxalil Yo‘ldoshevning jamoasi - «Pari NN» RPL mavsumining bahorgi qismini Sankt-Peterburg»da peshqadam «Ze-nit»ga qarshi o‘yin bilan boshlab, ortga golsiz va ochkosiz qaytdi - 0:3. 22 yoshli hamyurtimiz 18-tur doirasidagi ushbu samarasiz bahsning 76-daqiqasida zaxiradan maydonga tushdi. Yo‘ldoshevning joriy mavsumdagi statistikasi: 17ta o‘yin, 2ta gol, 5ta sariq kartochka. Tarkibida Hojimat Erkinov to‘p surayotgan «Torpedo» esa «Krasnodar» mehmoni bo‘lib, 2:2 hisobini qayd etdi. Biroq legionerimiz jamoa qaydnomasiga kiritilmadi. Erkinov RPL-2022/2023ning 15ta o‘yinida 1ta gol urgan va 4 marta sariq kartochka olgan. Moskva klubi atigi 7 ochko bilan yaqqol autsayder bo‘lib turibdi.
RPLdan keyingi o‘rinda turuvchi Rossiya Milliy futbol ligasida ham mavsumning ikkinchi qismi boshlandi. 21-turdan o‘rin olgan «Nefteximik» - «Alaniya» uchrashuvida yaqinda Vladikavkaz klubi bilan 3,5 yillik shartnomani rasmiylashtirgan Husayn Norchayev rasmiy debyutini nishonladi. Aniqrog‘i, terma jamoamizga nomzod hujumchi 63-daqiqada zaxiradan o‘yinga qo‘shildi. Mezbonlar vakili Vagiz Galiulin esa 70-daqiqaga qadar maydonda harakatlandi. Rustam Ashurmatov va Umarali Rahmonaliyevning klubi - «Rubin» tur o‘yinini kecha «Kuban» maydonida o‘tkazdi.
Saudiya Arabistoni.
Mamlakat chempionati peshqadami «Al-Nasr» 19-turda «Al-Batin»ga qarshi kechgan o‘yinda 90-daqiqadan keyin urilgan ketma-ket 3ta gol evaziga mag‘lubiyatni g‘alabaga aylantirdi. Ya’ni asosiy vaqt yakunida 0:1 hisobida ortda borgan Ar-Riyod jamoasi qo‘shimcha daqiqalarda 3 ochkoni o‘z tomoniga og‘dirdi. Nihoyat, «An-Nasr»ning boshlang‘ich tarkibga kiritilgan Jaloliddin Masharipov tanaffusda o‘z o‘rnini zaxira vakiliga bo‘shatib bergan bo‘lsa, to‘liq vaqt maydonda harakatlangan Krishtianu Ronaldu bu safar o‘yinni golsiz yakunladi.
«An-Nasr» - «Al-Batin» - 3:1 (0:1)
Gollar: G‘arib (90+3), al Fatil (90+12), Maran (90+15) - Lopes (17).
«Al-Nasr»: al Aqidiy, al G‘anam (Abdulla, 82), Madu, al Avjamiy (al Fatil, 90), Konan, Luis Gustavo, al Najiy (Bushal, 76), al Xaybariy (al Sulayhim, 46), Ronaldu, Jaloliddin Masharipov (Maran, 46), G‘arib.
Aytgancha, Ronaldu tufayli «An-Nasr» ijtimoiy tarmoqlarda katta o‘sishga erishmoqda. Ma’lumotlarga ko‘ra, Saudiya klubining «Tvitter»dagi sahifasi obunachilari soni 12,5 million kishiga yetdi. «Nasr» bu borada dunyo klublari orasida faqat «Galatasaroy» va «Barselona»dan ortda qolmoqda. «Instagram»da esa «Al-Nasr» 150 million obunachiga ega va bu 4-ko‘rsatkichdir. Oldinda «Barselona» (203 million), «PSJ», (207 million) va «Real» (209 million) bor. Yana bir xabar shuki, portugaliyalik 38 yoshli hujumchi Saudiya Arabistoni chempionatining fevral oyidagi eng yaxshi futbolchisi sifatida e’tirof etildi. Binobarin, u yakunlangan oy o‘z hisobiga 4ta o‘yinda 8ta gol va 2ta samarali uzatma yozib qo‘ydi.
Italiya. «Spesiya» «A» seriya 25-turida «Verona»ni qabul qilib, 0:0 hisobi bilan cheklandi. Shu bilan Eldor Shomurodov jamoasining g‘alabasiz seriyasi 7ta o‘yinga yetdi. Hamyurtimiz 5 mart kuni bo‘lgan uchrashuvning 75-daqiqasidagina maydonga tushdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
