Jarohat futbolchining qismatida bor bo‘lib, bundan qochib qutulish mushkul. Afsuski, “Andijon” jamoasidagi yana bir asosiy o‘yinchilardan biri safdan chiqdi.
Yaqinda Nodari Kavtaradze “Paxtakor”ga qarshi bellashuv paytida tizzasidan jiddiy jarohat olgani haqida ma’lumot bergandik. Endi esa iqtidorli yarim himoyachi Sardorbek Azimov ham davolanish jarayonini o‘tkazmoqda. Boisi, uning oyog‘ida ham jarohat borligi ma’lum bo‘ldi.
Ko‘rdingiz, birinchi davrani ushbu o‘yinchi ham qoyilmaqom tarzda o‘tkazib, g‘alabalarga munosib hissasini qo‘shdi. Ayniqsa, jamoamizdagi eng yaxshi assist vazifasini bajarib kelayotgani so‘zimizni isbotlaydi. Boisi, hisobida 5 ta assist bor va Kubok doirasida o‘zi ham 1 ta gol urgan.
Uning holidan xabar olish uchun xonadonida bo‘ldik va hozircha futbolchi qo‘ltiqoyoqdan foydalanishga majbur bo‘lib turibdi.
— Sardor, jarohatingiz haqida o‘zingiz to‘liq ma’lumot berib o‘tsangiz.
— Bu jarohat “Buxoro” bilan uchrashuvda yuz berdi. Aniqrog‘i, 1-taym oxirida bo‘ldi. Shifokor o‘sha paytda muz qo‘ydi, unchalik bilinmadi. Jarohatim bilan o‘yinni davom ettirdim. Lekin uchrashuv so‘nggida og‘riq qattiqroq sezila boshladi va men murabbiydan almashtirishlarini so‘radim. Eng qiyini shundan keyin boshlandi. Oyog‘im shishib ketdi, qon tomirlari yorilib ketibdi, gematoma. Hozirda shu jarohatimni davolatib yuribman.
— Shifokorlar ko‘rigidasiz va bu qancha vaqtni o‘z ichiga oladi?
— Davolanish hamon davom etyapti. Boshida jiddiy emas, deb o‘yladik. Keyin bilsak shishish qaytmadi. Natijada og‘riq kuchayib bordi. Safga qachon qaytaman, hali bilmayman. Davolanishda davom etyapman.
— Birinchi davra yakunlari bo‘yicha eng yaxshi assist bo‘yicha 1-o‘rindasiz. Chunki hisobingizda 5 ta assist bor. Buni o‘zingiz ham hisoblab boryapsizmi?
— Bu vazifani bosh murabbiy bizdan doimo talab qiladi va har bir yarim himoyachi har o‘yinda buni amalga oshirishga harakat qiladi.
— “Andijon”ning birinchi davradagi ishtirokiga qanday baho berasiz?
— Ochig‘ini aytsam, bizda ajoyib jamoa shakllanib bormoqda. Bunga oxirgi o‘yinlarda ham guvohi bo‘lishingiz mumkin. Birinchi davrada yo‘qotilgan ochkolarni ikkinchi davrada to‘ldiramiz, degan umiddaman. Bizdan endi muxlislar faqat g‘alaba talab qilishadi. Shunga munosib tarzda javob berishga harakat qilamiz.
— 28 iyul kuni “Nasaf” bilan o‘yingacha qaytasizmi? Muxlislar sizni kutishyapti. Umuman olganda, hozirgi holatda kayfiyatingiz qanday?
— Rosti, yozgi yig‘inni o‘tkazib yuborishim meni xafa qilyapti. Iloji boricha tezroq safga qaytishga harakat qilaman.
— Baribir birinchi davradan keyin jamoamizning ancha-muncha potensiali ko‘rindi. Vaziyatga real qaraganda, mavsum oxirigacha “Andijon”ni qaysi o‘rinda ko‘ryapsiz va jamoada o‘z so‘zimni ayta olyapman, deb hisoblaysizmi?
— Endi birinchi davra ortda qoldi. Eng muhimi, oldinda. Hali bizni qiyin o‘yinlar kutmoqda. Shulardan kelib chiqib, agar o‘z o‘yinimizni ko‘rsata olsak, 4-5-o‘rinlarda tugatsak kerak. Hali o‘yinlar ko‘p. Chiroyli o‘ynab ishqibozlarni xursand qilsak va jamoa g‘alabalariga hissamni qo‘shsamgina o‘z so‘zimni aytishim mumkin. Hali hech narsa qilmadim, kuchli o‘yinlarimiz oldinda.
P.S. Sardorga sog‘lik-salomatlik tilaymiz va ishonamizki, futbolchimiz yana o‘zining ajoyib o‘yinlari bilan ishqibozlarimizni quvontiradi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
