Kuni kecha iqtidorli futbolchi Sunnatilla Abdullajonov "Andijon" bilan shartnoma imzolagani to‘g‘risida xabar berib o‘tgandik. Bu yil 28 yoshni qarshilaydigan yarim himoyachi klub matbuot xizmatiga intervyu berdi.
— Sunnatilla, «Andijon» klubiga xush kelibsiz! Shartnoma imzolangach, qanday hissiyotlarni kechirmoqdasiz?
— Avvalo, jamoa rahbariyatiga hamda murabbiylar shtabiga menga ishonch bildirib, jamoaga taklif qilishgani uchun rahmat aytmoqchiman. Shartnoma imzolaganimdan keyin hissiyotlar zo‘r, albatta xursandman. Oldimizda yangi mavsumga tayyorgarlikni davom ettirish uchun o‘quv-mashg‘ulot yig‘inlari bor. Mashg‘ulotlarni yaxshi o‘tkazib, tezroq chempionat boshlanishini kutyapman. Xudo xohlasa, yangi mavsumda muxlislarni albatta xursand qilamiz.
— Bu taklif sizga ko‘proq nimasi bilan yoqdi?
— «Andijon» klubi begona bo‘lmaganligi uchun uning muxlislarini yaxshi bilamiz. O‘yinlar chog‘ida stadionda qanaqa muhit hukm surishidan xabardormiz. Bunday muhitda to‘p surish hamma futbolchi uchun yoqimli. Bosh murabbiyning shaxsan o‘zi taklif qilib, ishonch bildirgani uchun «Andijon» jamoasi bilan shartnoma imzolashga qaror qildim.
— Andijonlik muxlislar sizni yaxshi eslashadi. 2018 yilgi mavsumda ham jamoa sharafini himoya qilgansiz. 5 yildan so‘ng yana qaytdingiz. Jamoada eski do‘stlaringizdan kimlarni ko‘rdingiz?
— 2018 yilda o‘ynab, 5 yildan keyin qaytganim va bu yerda tanish futbolchilar borligini ayta olaman. Jamoamiz sardori Ildar Mamatkazin va yana ko‘plab o‘yinchilar bilan birga o‘ynaganmiz, juda yaxshi tanishmiz. Shu tomonlaridan ham menga oson bo‘ladi, deb o‘ylayman. Chunki bunday jarayonda klubga kirishib ketish va moslashish holati tezroq o‘tadi. Albatta, bu narsa foydamga bo‘ladi, deb umid qilaman.
— Klubda qaysi raqamni tanladingiz va nima uchun?
— Bu mavsumda men uchun 11-raqamni tanladim. Chunki 2018 yili «Andijon»da to‘p surganimda ushbu raqamda o‘ynaganim uchun ham bu safar yana 11 ni tanladim.
— «Andijon» bilan o‘z oldingizga qanday maqsad qo‘ydingiz?
— O‘tgan mavsumda ko‘rdikki, «Andijon» barcha klublarga, ayniqsa, yuqori o‘rinlardagi jamoalarga haqiqiy bosh og‘rig‘i bo‘ldi. Bu yil ham o‘sha tempni tushirmasdan yaxshi raqobat ko‘rsatib, yanada yuqori pog‘onalarni egallashni maqsad qilganmiz.
— Andijonlik muxlislarga qanday gapingiz bor?
— Boya aytib o‘tganimdek, jamoa muxlislari stadionda boshqacha muhitni yarata oladilar va «Andijon»ni 90 daqiqa faol tarzda qo‘llab-quvvatlab turadilar. Ishonamanki, yangi mavsumda ham xuddi shunaqa bo‘ladi. Ular bizni qo‘llab turishdan charchashmasin va bu bizga qo‘shimcha kuch bo‘ladi. Ularni albatta xursand qilamiz.
«Andijon» matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
