Yakunlangan mavsum Superligada qolish vazifasini bir amallab uddalagan «Metallurg»ning tarqatib yuborilgani achinarli hol, albatta.
Tabiiyki, bir qator futbolchilar o‘ziga yarasha tarixga ega jamoa hayotida yorqin iz qoldirishdi. Bekobodda 2,5 yil faoliyat olib borgan Bosniya va Gersogovina vakili Kerim Palichni bemalol shundaylar qatorida tilga olish mumkin. Xo‘sh, tajribali yarim himoyachi ayni payt nima bilan mashg‘ul, uning keyingi rejalari qanday? Yaqinda Kerim bilan bog‘lanib, shu xususda suhbatlashdik.
- Avvalo, «Metallurg» uchun ko‘ngilsiz kechgan mavsum xususida to‘xtalsangiz...
- Ha, jamoa o‘z tarixida bunday og‘ir mavsumni ko‘rmagan bo‘lsa kerak... Axir chempionatda uzoq vaqt g‘alaba nimaligini bilmadik. Vaholanki, har qanday raqibga munosib qarshilik ko‘rsatdik, ammo nimadir yetishmadi-o‘xshamadi. Oxirgi turlarda biroz jonlanib, vaziyatni o‘nglaganimiz va Superligada qolish vazifasini bajarganimizni hisobga olsak, jamoa bilan yuz bergan keyingi voqealar juda alamli...
- Umuman, «Metallurg»ning Superligada bu darajada yomon ishtirok etishiga nima sabab bo‘ldi?
- Bu savolga jamoa futbolchilari ham, murabbiylari ham aniq javob berolmasalar kerak. Qaytaraman, aksariyat o‘yinlarda raqibdan aslo qolishmadik, mag‘lubiyat bilan yakunlangan bahslarda ham oxirigacha kurashdik. Omadsizlik va vaziyatlardan foydalanolmaslik ortidan salbiy natijalar ko‘paygani sari yigitlarda bosim kuchaydi. Oddiy aytganda, vaziyat taqozosiga ko‘ra, shunday holatga tushib qoldik. Boshqa yana nima deyishim mumkin...?
- Boshida jamoa xorijlik mutaxassislar boshqaruvida pastga sho‘ng‘idi, keyin ishni mahalliy murabbiylar davom ettirishdi. Balki murabbiylar shtabidagi qo‘nimsizlik ham «Metallurg» zarariga ishlagandir...
- Futbolchi sifatida murabbiylar ishini muhokama qilishim nojoiz. Ehtimol, mahalliy mutaxassislar ertaroq boshqaruvni qo‘lga olishganida, vaziyat bu qadar og‘irlashib ketmasmi-di...?
- Bizdagi ma’lumotlarga qaraganda, «Metallurg» bilan shartnomangiz 30 noyabr kunigacha mo‘ljallangan edi. Dekabrdagi o‘yinlarda ham ishtirok etganingizni hisobga olsak, kelishuv muddati uzaytirilgandi, shundaymi?
- Ha, «Metallurg»ni og‘ir o‘yinlar kutib turganini nazarda tutib, bitimni yangilagandik, faqat qisqa muddatga - 10 dekabrgacha.
- O‘zbekistonda 2,5 yil o‘ynadingiz. Ichki birinchiligimiz va yurtimizga bog‘liq umumiy taassurotlaringiz qanday?
- Mahalliy chempionat saviyasi chakki emas. Ayniqsa, oxirgi mavsum Superligada o‘tkinchi o‘yinlar qolmadi, hisob. Mamlakatingizga kelsak, menga g‘oyat go‘zal an’ana va madaniyatga ega o‘lkada faoliyat yuritish nasib etganidan xursandman. O‘zbekiston ikkinchi vatanim bo‘lib qoldi. Bunda mubolag‘a yo‘q. Zero, yurtingizda unutilmas damlarni o‘tkazdim, ajoyib futbol oilasida yayradim. Qisqasi, O‘zbekistonning yuragimda chuqur joy olgani tayin.
- Endi rejalaringizga ham to‘xtalsangiz. Superligaga qaytishingiz mumkinmi, o‘zi klublardan chorlovlar bormi?
- Takliflar yo‘q emas, lekin ozgina dam olishim kerak. Chunki og‘ir mavsumdan so‘ng ruhiy toliqish bor. Yana biroz o‘zimga kelib olay, keyin yangi chaqiriqlar ustida bosh qotiraman. Agar O‘zbekistonga qaytish uchun munosib variant chiqsa, rozi bo‘laman, albatta.
- Bekoboddagi faoliyatingiz davomida moliyaviy muammolar ham sezilganmidi? Umuman, o‘zbek futbolida qanday kamchiliklarni payqadingiz?
- «Metallurg»da hech qachon maosh yoki ta’minot masalasida muammo ko‘rganim yo‘q. Chunki klub ortida moliyalashtiruvchi mexanizm bor edi. Shunday klubning to‘satdan tarqatilishi achinarli... O‘zbek futbolidagi kamchiliklar haqida esa mutaxassislar gapirishgani ma’qulroq.
- Oxirgi savol: O‘zbekistondagi faoliyatingiz davomida nimalarga erishdingiz? Bu tajriba faoliyatingiz uchun qay darajada foydali bo‘ldi?
- Tabiatan yangi tajribaga o‘chman. O‘zbekiston chempionatida o‘ynash orqali futbolchi sifatida yanada o‘sishga erishdim, o‘zgacha madaniyat bilan tanishdim, yangi-yangi do‘stlar orttirdim. Shunday ekan, bu tajriba kelajakda ham qaysidir jihatdan asqotishiga ishonaman.
XURSHIDBEK suhbatlashdi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
