O‘tgan mavsum yakunlariga ko‘ra, Fransiyaning «Lill» klubi tarixidagi uchinchi eng yaxshi to‘purarga aylangan Jonatan Devid 4 iyul kuni «Yuventus» bilan 5 yillik shartnoma tuzish asnosida «A» seriyaga yuzlandi. Tabiiyki, Kanada milliy jamoasi goleadorlari ro‘yxatini boshqarib turgan 25 yoshli hujumchi «keksa sinyora» tarkibida ham yuqori samaradorlik namoyish etishni ko‘zlamoqda. Devid yangi mavsum oldidan Turin klubi rasmiy saytiga bergan intervyusida bu xususda alohida to‘xtaldi.
— Avvalo, «Yuventus»dagi ilk kunlar qanday o‘tgani haqida gapirib bersangiz...
— «Yuventus»dek yirik klubning bir qismiga aylanish — katta sharaf, albatta. «Keksa sinyora» safiga qo‘shilishim bilan zimmamga katta mas’uliyat yuklanganini yaxshi tushunib turibman. Zero, «Yuve» tarixining o‘zi istalgan futbolchini oq-qora tusli libosga munosib o‘ynashga undaydi. Taassurotlarga kelsak, kutganimdek, Turindagi birinchi hafta juda zo‘r o‘tdi. Asosiysi, yangi klubdoshlarim bu yerdagi muhitga tezroq ko‘nikishim uchun qo‘ldan kelganicha yordam berishdi. Xullas, hozir hammasi joyida.
— «Yuve» taklifini qabul qilishdan oldin jamoa tarkibidagi amerikalik futbolchilar bilan gaplashish imkoni bo‘ldimi?
— Ha, lekin avvalo, klub rahbariyati vakillari bilan fikr almashdik. Shundan so‘ng amerikalik yigitlardan ba’zi narsalarni so‘radim. Ular Italiya futbolida bemalol o‘z o‘rnimni topa olishimga ishontirishdi. Shu asnoda Turin klubidagi istiqbolim yuzasidan hech qanday shubha qolmadi. Aslida o‘zimda ham «Yuventus» libosini kiyish ishtiyoqi juda yuqori edi.
— Mana, jamoa bosh murabbiyi Igor Tudor bilan ham yaqindan tanishib oldingiz. Ilk taassurotlar qanday?
— Tudor dastlabki o‘zaro suhbat chog‘iyoq maqsad va rejalarimga qiziqdi. Shuningdek, markaziy hujumchi sifatida asosiy vazifam gol urish ekanligini aytdi, o‘yin davomida nimalarga ko‘proq e’tibor qaratishim kerakligini tushuntirdi. Ko‘rinib turibdi, bu mutaxassis «Yuve»ni yuqori marralar sari yetaklay oladi.
— Ko‘pchilik «A» seriyada ham to‘purarlik qobiliyatingizni namoyish eta olishingizga ishonmoqda...
— Italiya chempionatida taktika va himoyaviy o‘yinga katta e’tibor qaratilishini yaxshi bilaman. Tabiiyki, har joyda o‘ziga yarasha murakkabliklari bor. O‘ylaymanki, tinimsiz mehnat va izlanish natijasida barchasiga yechim topish mumkin. Qisqasi, «A» seriyada ham nimalarga qodirligimni ko‘rsatishga tayyorman.
— «Yuventus» tarixiga nazar solib, sizni chinakamiga hayratga solgan qaysidir futbolchini ayta olasizmi?
— «Yuventus» — dunyo futboliga ko‘plab afsonalarni taqdim etgan buyuk klub. Masalan, Dibala, Del Pyero, Trezege... Xullas, meni hayratga solgan katta futbolchilar shu qadar ko‘pki, hozir kimnidir alohida ajratib ko‘rsatishim qiyin.
— Aytingchi, nega APL emas, aynan «A» seriyani tanladingiz?
— Yana bir bora ta’kidlayman, har bir chempionatda o‘ziga yarasha joziba, raqobat va qiyinchilik mujassam. Jumladan, Italiya ligasi ham ko‘plab futbolchilar o‘ynashni orzu qiladigan sifatli birinchilikdir. Tanlovimga to‘xtalsam, men bolalikdan muxlislik qilgan klublar qatorida «Yuventus» ham bor edi. Oddiy aytganda, «keksa sinyora» libosini kiyish orzusi meni «A» seriya sari yetakladi.
— Bolalik haqida gap ochilgan ekan, o‘sha vaqt aynan qaysi futbolchilarga havas bilan qaraganingizni eslasak...
— Bilasizmi, futbol sir-asrorlarini endigina tushuna boshlaganimda, Didye Drogba va Samuel Eto'Oning maydondagi harakatlarini ko‘rib, shunchaki, qoyil qolardim. Ular maydonda mislsiz ishtiyoq bilan to‘p surishardiki, o‘yinlarini tomosha qilgan odam chinakamiga zavqlanardi.
— To‘purarlik mahoratingiz mehnat va mashg‘ulotlar hosilasimi yoki Yaratgan tomonidan berilgan iste’dod?
— Barcha futbolchilar kabi bolaligimdan o‘zimni qaysi pozisiyada qulay his qilsam, o‘sha nuqtada bor salohiyatimni ishga solish va o‘yinimni doimiy ravishda takomillashtirib borishga zo‘r berganman. O‘ylashimcha, shu kungacha erishgan muvaffaqiyatlarim faqatgina mehnat mahsuli emas, balki ishga nisbatan professional yondashuv, intilish va e’tiqod uyg‘unligi samarasidir.
— Qiziq, «Yuventus»da nega aynan 30-raqamni oldingiz?
— Futbolchi sifatida kamol topib, hozirgi darajaga ko‘tarilishimda otamning xizmati beqiyos. Uning doimiy e’tibori va qo‘llab-quvvatlashisiz hech nimaga erisholmasdim. Xullas, kamolotim yo‘lida sabr-toqat bilan mehnat qilganiga minnatdorchilik ifodasi o‘laroq, libosimda otamning tug‘ilgan sanasini aks ettirishni xohladim. Umuman, 30-raqam men uchun nihoyatda muhim timsol hisoblanadi.
— Sizningcha, «Yuventus» yaqin orada avvalgi mevqeini tiklay oladimi?
— Har bir mavsumning o‘z sarguzashtlari va raqobati bo‘lishi kabi navbatdagisi ham kutilmagan voqeliklar, turli sinovlarga boy o‘tishiga zarracha shubha yo‘q. Muhimi, futbolchi hamisha marraga birinchi bo‘lib yetib borish uchun intilishi kerak. Bilaman, «A» seriya — murakkab liga, lekin yetakchilikni qo‘lga olish imkonsiz vazifa emas. Albatta, biz ham bunga astoydil harakat qilamiz.
— Eshitishimizcha, sizga «muz odam» laqabini ham berishgan ekan. Buning qandaydir sababi bormi?
— Ha, tabiatimga juda mos keladigan laqab. Chunki maydonda o‘ta sovuqqon odamga aylanaman. Shu asnoda eng hayajonli daqiqalarda ham diqqatni jamlash va hujumlarni samarali yakunlashga intilaman.
— Jamoada mavjud raqobat yuzasidan nima deysiz? O‘zingizni boshlang‘ich tarkib futbolchisi sifatida ko‘ryapsizmi?
— «Yuventus»da hech kimga asosiy tarkibdan joy kafolatlangan emas. Jumladan, men ham barcha o‘yinlarda boshlang‘ich tarkibga kiritilishimni kutmayman. Lekin har bir imkoniyatdan maksimal darajada foydalanish uchun bor salohiyatimni ishga solaman. Albatta, raqobatga tayyorman va barcha hujumchilar kabi gol urishni xush ko‘raman. Zero, gollar va g‘alabalar yonma-yon yuradi.
— «Yuventus» «Oltin to‘p» sovriniga da’vogarlik qilishingizga yordam bera oladimi?
— To‘xtang, bu mukofot haqida gapirishga hali erta. To‘g‘ri, menda ham «Oltin to‘p»ni yutish orzusi borligini yashirmayman. Aslida aynan shu maqsadda katta ambisiyalarga ega jamoani tanladim va «Yuventus»da dunyoning eng yaxshi to‘purarlaridan biriga aylanish asnosida vaqti kelib, mazkur sovrin laureati bo‘lishni istayman.
— Psixologik jihatdan katta sarguzashtlarga tayyormisiz?
— Albatta. Axir aynan shuning uchun «Yuventus»daman. Bu yerda mendan nima kutishayotganini yaxshi bilaman va ishonchni oqlashga tayyorman.
XURSHIDBEK tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
