«Chelsi» vakillari yozgi transferlar oynasining oxirgi kuni «Barselona» yarim himoyachisi Fermin Lopesni APL tomon tortishga shu qadar jiddiy harakat qilishdiki, ushbu kelishuvning amalga oshishi muqarrardek tuyuldi hatto. Ammo Kataloniya klubi rahbariyati oxirigacha iqtidorli futbolchini olib qolish qarorida qat’iy turdi. Ferminning o‘zi esa Mundo Deportivo nashriga bergan eksklyuziv intervyusida voqealar aslida qanday rivoj olganini batafsil gapirib berdi.
— Fermin, keling, suhbatimizni yozgi transferlar vaqtida ro‘y bergan voqeliklar tafsiloti bilan boshlasak. Aytingchi, «Chelsi»ning o‘ylab ko‘rishga arziydigan taklifini rad etib, «Barselona»da qolish qarorini qabul qilishda qiynalmadingizmi?
— Ochig‘ini aytaman, futbolchi rolida har doim «Barsa»da to‘p surishga asosiy maqsad o‘laroq qaraganman. Esimda, Kataloniyaga 12 yoshimda kelganman va o‘shandayoq eng katta orzum aniq edi — asosiy jamoa futbolchisiga aylanish. Albatta, boshqa klublar nigohiga tushish va aniq taklif olish ham g‘oyat yoqimli, lekin hozircha bor fikru-xayolim «Barselona»da o‘ynash, shu klubda muvaffaqiyat qozonish bilan band.
— Qiziq, «Chelsi» o‘ylab ko‘rish uchun 48 soat muhlat berganida, xayolingizdan nimalar o‘tdi?
— Takrorlayman, asosiy maqsadim — «Barsa»da o‘ynash. Umuman, jamoadagi kelajagimga hech qachon shubha ham qilmaganman. Bolalik davrlaridanoq har doim «Kamp Nou»da o‘ynash, muvaffaqiyatga intilish va klubga yordam berish uchun bor salohiyatimni ishga solib kelyapman. Shunday ekan, «Chelsi» chorlovi ustida bosh qotirganim yo‘q.
— Ijtimoiy tarmoqlarda o‘tkazilgan turli so‘rovlar natijasiga qarasak, ko‘pchilik muxlislar ham sizning «Barselona»da qolishingiz uchun ovoz berishdi. Bunday so‘rovlarga o‘zingiz ham qiziqib qaragandirsiz...
— Ha, albatta. So‘rov natijalari quvontirgani tabiiy. Umuman, asosiy jamoa safiga qo‘shilganimdan buyon muxlislar armiyasi mehrini yaqqol his qilyapman. Fanatlar muhabbatiga erishish — istalgan futbolchi uchun sharaf. Muxlislar meni «Barsa»ning muhim futbolchilari qatorida ko‘rishayotgan ekan, ishonchni oqlash uchun bor salohiyatimni ishga solaman.
— «Chelsi»dan taklif tushgach, Xans-Diter Flik siz bilan alohida gaplashibdi. Aytingchi, suhbatda asosan nima haqda gap ketdi?
— Bunday ma’lumotlar klubning ichki siri bo‘lib qolgani ma’qul. Bosh murabbiy bilan gaplashib, ayrim masalalarni muhokama qilganimiz rost, lekin tafsilotlarga to‘xtalishni istamayman. Muhimi, ishonch va e’tibor o‘sha-o‘sha. Agar barchamiz yagona maqsad yo‘lida birlashib, bir-birimizga yordam bersak, o‘ylaymanki, joriy mavsumni ham yuqori kayfiyatda o‘tkazamiz.
— Dunyoning eng kuchli ligasidan tushgan chorlov fonida «Barselona»da qolish shaxsan o‘zingiz uchun nechog‘li muhim edi?
— Tushunarliki, millionlar o‘yinida nimalar ro‘y berishini oldindan aytish qiyin. Har holda, ba’zan barchasi futbolchining ixtiyorida bo‘lmaydi. Ha, «Chelsi» har kimga ham taklif bilan chiqavermaydi. Lekin mening ustuvor maqsadim o‘zgarmaydi — «Barsa»da o‘ynash.
— Jamoadoshlaringiz ham sizni Kataloniyada qolishga undagandirlar...
— Bu masalada aksariyat yigitlar, klub xodimlari bilan gaplashdim. Ayniqsa, ter Shtegen, Arauxo, Pedri va Rafinya bilan suhbatlardan so‘ng klub uchun muhim futbolchi ekanligimni angladim. Umuman olganda, mazkur vaziyatda meni butun jamoa qo‘llab-quvvatladi, «Barsa»da qolishimni so‘radi. Kiyinish xonasidagi bunday munosabatdan boshim osmonga yetgani o‘z-o‘zidan tayin. Shuningdek, Flik bilan muloqot jarayonida yangragan fikrlar asnosida nechog‘li ishonchli qaror qabul qilayotganimni tushunib yetdim. Xullas, Kataloniyada baxtiyorman. Kelajakda nimalar bo‘lishini esa vaqt ko‘rsatadi. Maqsadim o‘sha-o‘sha — «Barsa»da uzoq yillar muvaffaqiyatli to‘p surish.
— Markus Reshford kelgani ortidan siz o‘ynaydigan pozisiyada raqobat yanada kuchaydi. Tarkibdagi o‘rningizni yo‘qotib qo‘yishdan qo‘rqmaysizmi?
— Aslo. «Barsa»da har doim katta ijrochilar o‘ynashgan — kuchli raqobat tabiiy holat. Asosiysi, o‘z salohiyatimga to‘liq ishonaman, kerak pallada jamoaga sifatli yordam bera olaman. Qisqasi, har qanday vaziyatda doimgidek kamtarlik bilan ishlashda davom etmoqchiman.
— Oxirgi haftalar Gavi bilan munosabatlaringiz yomonlashgani haqida ko‘p gapirildi. Uzoq yillik qadrdonlarning bir-biridan uzoqlashishiga nima sabab bo‘ldi?
— Gavi 12 yoshimdan buyon yaqin do‘stim va hozir ham shunday. U bilan juda ko‘p sarguzashtlarni birga boshdan kechirdik. O‘rtamizdagi munosabat buzilgani haqidagi gap-so‘zlar haqiqatga mos emas. Ya’ni hamon avvalgidek inoqmiz va kimlarningdir taxminlari bu borada hech narsani o‘zgartirmaydi.
— Yaxshi. Unda bu mavzuni yopamiz va terma jamoa bo‘limiga o‘tamiz. Ispaniya termasida xuddi «Barsa»da bo‘lgani kabi raqobat juda yuqori. Aytingchi, «qizil furiya» tarkibida o‘z o‘rningizga egaligingizni qay darajada his qilyapsiz?
— O‘zingiz aytganingizdek, «Barselona» va Ispaniya terma jamoasida raqobat darajasi bir xil. Boshqacha bo‘lishi ham mumkin emas. Axir milliy jamoada mamlakatimizdagi eng kuchli futbolchilar jamlanishgan. Yashirmayman, raqobat o‘ta kuchli va hamisha asosiy tarkibdan joy olish qiyin. Ustuvor vazifa esa — terma jamoa muvaffaqiyatiga hissa qo‘shish uchun doimo ideal sport formasida bo‘lish. Shunday ekan, mashg‘ulotlarda o‘z mahoratimni maksimal darajada namoyon etgan holda, saralanganlar orasida o‘z o‘rnimni topish hamda murabbiylar, muxlislar ishonchini oqlash uchun astoydil harakat qilaman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
