Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
2025 yil O‘zbekiston futboli tarixida chinakam «oltin davr» sifatida muhrlandi. Mamlakatimizning barcha yoshdagi terma jamoalari va futbolchilari xalqaro maydonda ulkan muvaffaqiyatlarga erishib, millionlab muxlislarga quvonch bag‘ishladilar. Ayni shu yilda milliy terma jamoaning o‘yinlaridan ko‘ngli to‘lmay, futboldan ko‘ngli sovigan insonlar yana futbolga qaytgan bo‘lsa, ajab emas. Bir yilning o‘zidan bir necha yillarga arzigulik xotiralar qoldi. Mazkur maqolada Anhor.uz talqiniga ko‘ra, yakunlanayotgan yilning o‘zbek futboli uchun eng muhim yettita yutug‘i hikoya qilinadi.
7-o‘rin: “Al Ain Cup” kubogidagi g‘alaba
Birlashgan Arab Amirliklarida Eron, Kabo-Verde, O‘zbekiston va Misr terma jamoalari ishtirok etgan xalqaro turnirining final o‘yinida O‘zbekiston Eronni mag‘lub qilib, musobaqa g‘olibiga aylandi.
O‘yinning birinchi bo‘limida vakillarimizda imkoniyatlar bo‘ldi, ammo futbolchilarimiz undan foydalana olmadi. Ikkinchi bo‘limning 70-daqiqasida Abduqodir Husanov Abdulla Abdullayevning ishonchsiz uzatmasidan so‘ng raqib o‘yinchisini keskin to‘xtatishga majbur bo‘ldi va qizil kartochka olib, maydondan chetlatildi. Shundan so‘ng, o‘yin butunlay Eron jamoasi nazorati ostida yakunlandi. Shu tariqa, asosiy bo‘limlarda hisob ochilmagach, bahs g‘olibi nomi penaltilar seriyasida aniqlandi. Unda O‘zbekiston milliy jamoasi Abduvohid Nematovning ishonchli harakatlari sabab, “Al Ain Cup” turnirining g‘olibiga aylandi.
6-o‘rin: CAFA Nations Cup-2025 g‘olibligi
Sentyabr oyida Toshkent va Dushanbe mezbonlik qilgan CAFA Nations Cup-2025 kubogida O‘zbekiston milliy terma jamoasi zafar quchdi. 8 sentyabr kuni Toshkentdagi yangi qurilgan olimpiya shaharchasida qad rostlagan «Olimpiya» stadionida CAFA Nations Cup-2025nig final o‘yinida O‘zbekiston va Eron milliy terma jamoalari yana bir bor o‘zaro ro‘baro‘ kelishdi. Yakunda vakillarimizning qo‘li baland kelib, kichik, 1:0 hisobida zafar quchishdi. Bu natija o‘laroq jamoamiz musobaqa chempioniga aylandi.
O‘yindagi ilk muhim epizod 5-daqiqada Eron terma jamoasi o‘yinchisining qizil kartochka olib, o‘yinni tark etishidan boshlandi. Shu vaziyatdan boshlab, o‘yin yakuniga qadar Eron maydonda bir kishi kam bo‘lib harakatlandi. Shunday bo‘lishiga qaramay forslar jamoasi o‘yinning asosiy vaqtida durang natija qayd eta oldi. Faqatgina qo‘shimcha bo‘limlarning so‘nggi daqiqalarida “fors devori O‘zbekistonning hujumlariga dosh berolmay quladi”. O‘zbekiston tarkibidan yagona kiritilgan golga Hojiakbar Alijonov mualliflik qildi.
5-o‘rin: Eldor Shomurodovning Turkiyadagi renessansi
Milliy terma jamoa sardori Eldor Shomurodov «Istanbul Bashakshehir» safida o‘zining ikkinchi yoshligini o‘tkazmoqda. Iyul oyi avvalida «Istanbul Bashakshehir» Eldor Shomurodov transferini e’lon qildi. Ijara qiymati — 3 mln yevro.
Istanbul jamoasi o‘zbekistonlik futbolchini 2,7 mln yevro evaziga sotib olish imkoniyatiga ega bo‘ladi. Shuningdek, shartnomada Shomurodovning keyinchalik sotuvidan rimliklar 10 foiz ulushga ega bo‘lishi ko‘zda tutildi. Eldor bunga qadar o‘tgan mavsumda A Seriyada 27 ta o‘yinda 4 ta gol urgan va 4 ta golli uzatmani amalga oshirgandi.
25 dekabr kuni Turkiya Superligasi birinchi davrasining ramziy jamoasi e’lon qilindi va unga «Bashakshehir» klubi va O‘zbekiston milliy jamoasi sardori Eldor Shomurodov ham kiritildi. 30 yoshli hujumchi joriy mavsum Superliga doirasida 12 ta gol urdi va 3 ta golga assistentlik qildi. Ushbu natijalar Shomurodovning ramziy jamoadan joy olishiga sababchi bo‘ldi.
4-o‘rin: Toifni titratgan O‘zbekiston: U-17 terma jamoasining chempionligi
O‘zbekiston U-17 terma jamoasi Saudiya Arabistonida o‘tgan Osiyo kubogida chinakam qahramonlik ko‘rsatdi. Final o‘yinida Islom Ismoilov boshchiligidagi O‘zbekiston mezbon, Saudiya Arabistoni o‘smirlarini 2 kishi kam bo‘lib qolganiga qaramay 2:0 hisobida mag‘lub qilishdi.
Ularga prezident sovg‘asi sifatida Chevrolet Cobalt avtomobillari sovg‘a qilindi. Jamoa murabbiylar shtabiga esa Chevrolet Tracker avtomobili taqdim etildi. Musobaqa yakunlariga ko‘ra:
-
Sadriddin Hasanov — turnirning «eng yaxshi futbolchisi»;
-
Asilbek Aliyev — «eng yaxshi to‘purar»;
-
Ne’matulloh Rustamjonov — «eng yaxshi darvozabon» deb topildi.
3-o‘rin: Farg‘onaning qaytishi: «Neftchi»ning O‘zbekiston chempionligi
Mamlakat ichki chempionatida ham katta o‘zgarish yuz berdi. Vitaliy Levchenko boshchiligidagi «Neftchi» klubi muddatidan oldin Superliga chempionligini qo‘lga kiritdi. Bu farg‘onaliklar uchun tarixdagi oltinchi chempionlik bo‘ldi. Muxlislar jamoa chempionligini 24 yil kutishdi.
«Neftchi» 64 ochko bilan turnir jadvalida 1-o‘rinni naqd qildi va kelasi mavsum Osiyo Elit Chempionlar ligasida O‘zbekiston sharafini himoya qiladi. Xayrullo Bozorov tashabbusi bilan yil boshida Farg‘ona klubi bir qator katta transferlarni amalga oshirgan va 2025 yilda Superliganing eng katta byudjetga ega jamoalaridan biri bo‘lgandi. Mavsum yakunida jamoaga Osiyo chempioni bo‘lgan murabbiy Islombek Ismoilov yangi bosh murabbiy etib tayinlandi.
2-o‘rin: Abduqodir Husanov — Osiyoning eng qimmat futbolchisi va «Manchester Siti» transferi
2025 yil o‘zbek futboli uchun rekordlar yili bo‘ldi. Himoyachi Abduqodir Husanov 45+5 mln yevro evaziga Angliyaning «Manchester Siti» klubiga transfer qilindi.Husanov Manchester klubi bilan 4,5+1 yillik sxemasidagi bitimni imzoladi. U o‘zbek futboli tarixidagi eng qimmat futbolchiga aylandi. Ko‘p o‘tmay, «Transfermarkt» talqiniga ko‘ra, u Osiyoning eng qimmat futbolchisi maqomini egalladi.
Ahamiyatlisi, u, ko‘plab mutaxassislar tomonidan, dastlab, zaxira o‘rindig‘ida qolishi aytilgan bo‘lsa-da, Pep Gvardiola unga kelishi bilanoq imkon bera boshladi. O‘zbekistonlik futbolchi klubdagi ilk o‘yinlaridanoq «Chelsi», «Real Madrid» kabi nomdor raqiblarga qarshi o‘yinlarni asosiy tarkibda boshladi. Himoyachi bugungi kunga qadar klub bilan turli musobaqalarda 19 o‘yinda maydonga tushdi. Shuningdek, mamlakat milliy terma jamoasi safida ham 14 o‘yinda himoya chizig‘ida ishonchli harakat qildi.
1-o‘rin: Tarixiy voqea: O‘zbekiston milliy terma jamoasining JCH-2026 yo‘llanmasini qo‘lga kiritgani
34 yillik orzu nihoyat amalga oshdi! 2025 yilning 5 iyun kuni Abu-Dabidagi «Al Nahayyon» stadionida BAAga qarshi kechgan bahsda qayd etilgan 0:0 hisobidagi durang O‘zbekistonga o‘z tarixida ilk bor Jahon chempionati yo‘llanmasini taqdim etdi. Shu kuni millionlab o‘zbekistonliklarning xonadonida kichik «to‘y» bo‘ldi, odamlar butun oy davomida mana shu natija kayfiyati bilan yashadi, desak xato bo‘lmasa kerak. FIFA prezidenti Janni Infantino ushbu muvaffaqiyat bilan o‘zbek xalqini tabriklab, «Oq bo‘rilar»ning debyutini butun dunyo intiqlik bilan kutayotganini ta’kidladi. Ushbu tarixiy g‘alaba uchun prezident Shavkat Mirziyoyev futbolchilarni BYD avtomobillari bilan taqdirladi.
Fabio Kannavaro boshchiligidagi O‘zbekiston terma jamoasi «K» guruhidan joy oldi. Guruhda jamoamizning raqiblari Portugaliya, Kolumbiya va pley-off g‘olibi (Kongo DR / Yamayka / Yangi Kaledoniya jamoalari o‘rtasidagi o‘tish o‘yini) bo‘ladi.
Xulosa qilib aytganda, 2025 yil o‘zbek futbolining jahon xaritasidagi o‘rnini mustahkamladi. JCH-2026 qur’asiga ko‘ra, debyut musobaqamizda Portugaliya va Kolumbiya kabi grandlar bilan bir guruhdan joy olganimiz esa kelasi yil ham bizni hayajonli lahzalar kutayotganini bildiradi.
Doniyor Mamatqulov
Қаҳрамон Асланов
Шуҳрат Шокиржонов
Шерзод Ражабов
