Ikki o‘yinni solishtirish esa chamamda noto‘g‘ri natija beradi. Birinchisida, Urugvay mundialga tayyorgarlik doirasidagi so‘nggi o‘yinida maydonga tushdi.
Bunda futbolchilar Jahon chempionatini o‘tkazib yubormaslik uchun ham jarohat olmaslikka ongli ravishda harakat qilishadi.
Boshqa tomondan O‘zbekiston terma jamoasi Jakartadagi Osiyo o‘yinlariga tayyorgarlik ko‘rayotgani uchun, Kapadze termani asosan yoshroq futbolchilardan shakllantirishga harakat qilgandi.
Xitoydagi o‘yinda Kuper jamoasi ham 0:3 hisobida yengildi. Biroq bu umuman boshqa uchrashuv. Bunda Urugvay safida bir qator yetakchilar o‘ynay olmadi, ammo ulardan kam emasligini ko‘rsatmoqchi bo‘lgan A seriya yigitlari bor edi. O‘yinga bo‘lgan munosabat ham, vaqt ham, maydon va makon ham umuman boshqa edi.
Savol: Kuper 0:2 yoki 0:1 hisobida yengilganida xursand bo‘larmidik? Ya’ni, bu hisoblar bizdagi o‘sishni yoki oldinga qadamni ko‘rsatib berarmidi? Fikrimcha, solishtirish bunday bo‘lmasligi kerak. Agar Urugvay 5 ta gol urishi shart bo‘lganida, bizga har ikki o‘yinda ham 5 ta gol ura olardi. Chunki bu Urugvay mundialdagi eng yaxshi natijasini qayd etgan Rossiya termasiga ham o‘sha mundialning guruh bosqichida javobsiz 3 ta gol urgan (Rossiya futboli ham, O‘zbekiston futboli ham bir go‘r degan fikrga qo‘shilishim mumkin, ammo Rossiya termasi O‘zbekistondan kuchsiz degan fikrga qo‘shila olmayman).
Murabbiy tarkib tanlashda adashdi, deyishimiz mumkin. Ammo unda tarkib tanlash uchun 1 dona variat bor, bizda esa 10 dan ziyod. U futbolchilar kechasi qanday uxlagan-u, kimning
kayfiyati qanday yaxshiroq biladi, bizda esa bunday imkoniyat yo‘q.
Urugvay kabi raqiblarga qarshi o‘yinlarimizni solishtiraverishdan ma’ni yo‘q. Ularga qarshi 1 marta o‘ynaymizmi yoki 10 marta — o‘rganaverish kerak. Rasmiy o‘yinlardagi to‘qnashuvimizga qadar 10 marta 0:3 ga yutkazavermaymizmi, menga desa. Iordaniya yodingizdami, rasmiy o‘yin o‘tkazgandi Urugvay bilan.
Qachondir bizga ham shunday o‘yin nasib qiladi. Ungacha o‘rganaverish kerak. Chunki biz urugvaylik futbolchilardan o‘nlar chaqirim ortdamiz. Aniqroq chaqirimni bilib olish uchun nechta gol o‘tkazayotganimizga ko‘p urg‘u berish shart emas, demoqchiman.
Diyor Imomxjayev