Shon Daych 9 yil 5 oy 16 kunlik faoliyatidan keyin «Byornli»dan iste’foga chiqdi. APLning hozirgi murabbiylari orasida hech kim bundan uzoq vaqt ishlamagan: Daych ketganidan so‘ng Yurgen Klopp («Liverpul», 6 yilu 6 oy) hamda Pep Gvardiola («Manchester Siti», 5 yilu 9 oy) yetakchilikni qo‘lga olishdi.
Daych iste’fosining bosh sababi - qoniqarsiz natijalar: «Byornli» ushbu mutaxassis boshqaruvidagi so‘nggi oltita o‘yinning beshtasida mag‘lubiyatga uchrab, APLda 18-o‘ringa tushib qoldi (xaloskorlik pog‘onasi hisoblangan 17-o‘rin bilan oradagi farq 4 ochkoni tashkil etayotgandi).
Vaholanki, 2021 yilning sentyabrida rahbariyat va murabbiy hamkorlikni davom ettirish istagini bildirishgandi: mutaxassisning shartnomasi 2025 yilgacha cho‘zildi. «Ushbu kelishuvni imzolash, klub kelajagi va uning rivojlanishi haqida o‘ylash imkoniyati tug‘ilgani yaxshi bo‘ldi. Shuncha yildan so‘ng mazkur mintaqa va muxlislarga bog‘lanib qoldim. Jamoani to‘g‘ri yo‘nalish bo‘ylab olg‘a boshlashni davom ettirish, astoydil mehnat qilishni orziqib kutyapman», - degandi Shon o‘shanda.
Lekin «Byornli» mavsum-2021|2022 endi boshqa murabbiy qo‘l ostida yakunlaydi. Daychning buyukligiga sabablarni keltirib o‘tamiz:
— Shon «Byornli» boshqaruvini 2012 yilning oktyabrida qo‘lga olgandi - bunga «Uotford» bilan Chempionshipdagi muvaffaqiyatli faoliyat sabab bo‘lgandi. Yakunda u klub bilan naq 425ta o‘yin o‘tkazdi: 152 g‘alaba, 114 durang va 159 mag‘lubiyat.
— «Byornli» Daych bilan birga ikki marta Chempionshipdan APLga qaytdi va 51 yilda ilk bor yevrokuboklarga yo‘l oldi - mavsum-2018/2019da Yevropa Ligasida qatnashdi.
2021 yilning noyabrida Sports.ru Angliyaning mitti shahri hisoblangan Byornli haqida maqola tayyorlagandi. Unda Shon Daych shaxsiga ham alohida e’tibor qaratilgan - murabbiyni muxlislar yaxshi ko‘rishadi. Quyida Dariya Konurbayevaning yorqin sayohatidan ayrim lahzalarni havola etamiz.
«2021 yilning sentyabr oyi boshida, «Arsenal» bilan uchrashuv arafasida The Royal Dyche pabiga tashrif buyurgandim. Ushbu mo‘’jazgina maskanga o‘yinlar payti bolalar bilan kelish mumkin. Devorlar va shiftga turli yillardagi futbolkalar ilib qo‘yilgan, bar ustida esa sharflar va bayroqlar osilgan. Orqa hovlidagi bog‘ devorlariga klubning turli yillardagi logotiplari, shuningdek, Daychning to‘q qizil-ko‘k rangli portreti chizilgandi».
Fanatlar ham murabbiyga juda iliq munosabatdalar. Daychning «Byornli» uchun nechog‘li muhim ekanligini faoliyatining oxirida u bilan birga ishlagan sobiq darvozabon Pol Robinsonning so‘zlaridan ham anglash qiyin emas: «Angliyalik murabbiylarni odatda, futbolning primitiv uslubini qo‘llashda ayblashadi. Qisman shunday, lekin Shon ixtiyoridagi o‘yinchilarning eng yaxshi xislatlarini namoyon eta biladi. «Byornli»dagi va APLning boshqa klublaridagi byudjetni, keyin esa ularning so‘nggi yillardagi natijalarini solishtirib ko‘ring. Jamoa Yevropa Ligasiga chiqdi: «Byornli» toifasidagi klub uchun bu ajoyib ko‘rsatkich. O‘ylashimcha, Daych boshqa mamlakatdan kelgan murabbiy sifatida ayni natijalarni qayd etganida, yirikroq jamoalardan taklif olishi turgan gap edi. Bu yil «Seltik» yoki «Everton»da ish joyi bo‘shaganda, Shonning nomzodlar ro‘yxatida yo‘qligidan ajablangandim. Klub bosib o‘tgan yo‘l, rivojlanish va barqarorlikka nazar tashlab, hozirgi APLda bunday muvaffaqiyatga erishgan murabbiylar ko‘p emasligini aytishim mumkin. Ammo siz «Manchester Siti», «Yunayted», «Chelsi» yoki «Liverpul»ga murabbiy qidirayotgan bo‘lsangiz, fanatlar va rahbariyat «Byornli»ning modadan yiroq ustozini ko‘rishni istamasliklari tushunarli. Bunday devorni buzib, buyuklikka intilish Shon singari mutaxassislar uchun qiyin bo‘ladi».
Endi Daych yangi klub topishi kerak - uning sobiq jamoasida erishgan ko‘rsatkichlaridan kelib chiqsak, uzoq vaqt ishsiz qolmasligi aniq.
Dinamo
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
