Braziliyalik Neymar yangi mavsumni aqlga sig‘mas darajada yaxshi boshladi - u shunchaki, dahshatli statistikaga ega.
Umuman, «PSJ» yangi mavsum hisobidagi dastlabki 5ta o‘yinda naq 22ta gol urdi - har birida o‘rtacha 4,4tadan! Neymar esa faoliyati davomida hech qachon bunchalik sermahsul start qayd etgan emasdi.
Neymar dastlabki 5ta rasmiy o‘yinda «PSJ»ning 13ta golida bevosita ishtirok etdi. Bu oraliqda Yevropaning kuchli 5ta ligasida «GolQpas» tizimi bo‘yicha hech kim braziliyalikchalik ko‘p ochko ishlamadi. Vaholanki, yozning birinchi yarmida Neymar xilma-xil mish-mishlar aro qolgandi. Orada uning Parijdan ketishi muqarrardek ko‘rindi ham: yo klubni tark etadi, yoki qoladi. RMC Sport nashrida yozilishicha, Neymarga «PSJ» prezidenti Nosir al Xelayfining gaplari yoqmagandi. Qatarlik tadbirkor hujumchining ketishi ehtimoli haqida berilgan savolga oddiy javob bergandi: «Yangi mavsumda barcha futbolchilardan ko‘pro- jon kuydirishlarini talab qilaman». Xullas, Neymar o‘zini klubda qadri yo‘q futbolchidek his qildi. «PSJ»ning yangi bosh murabbiyi Kristof Galtye esa darhol braziliyalik yulduzni borasida o‘z pozisiyasini aytdi: «Neymar - jahon darajasidagi futbolchi. Qaysi murabbiy o‘z jamoasida shunday futbolchi o‘ynashini istamaydi? Undan nima xohlayotganimni aniq bilaman va jamoada qolishiga ham ishonchim komil». Shuning ta’siridami, futbolchi fikrini o‘zgartirib, Parijda qolmoqchi ekanligini bildirdi: «Klubda hech kim kelajagim haqida og‘iz ochgani yo‘q. Agar o‘zimga qolsa, faoliyatimni «PSJ»da davom ettiraman». Ehimolki, shu kabi chalkashliklar ham braziliyalikda motivasiyani kuchaytirgandir. Har holda, uning dastlabki o‘yinlardagi statistiskasi shunday xulosa chiqarishga undamoqda.
*** Fransiya superkubogi uchun bahsda «Nant» darvozasiga 2ta gol urdi - jarima zarbasi va penaltidan.
*** Liga 1ning ilk turidan o‘rin olgan «Klermon» bilan o‘yin (5:0)da «Gol+pas» tizimida 4 ochko (1ta gol va 3ta samarali uzatma) yig‘di.
*** «Monpelye»ga qarshi 2-tur o‘yini (5:2)da yana «dubl» qayd etdi. Bu safar avvaliga penaltidan foydalandi, keyin boshi bilan aniq zarba yo‘lladi.
*** «Lill» (3-tur) bilan o‘yin (7:1)da 2ta gol va 3ta samarali uzatma qayd etdi.
*** «Monako» (4-tur) bilan o‘yin (1:1)da jamoasining yagona goli (penaltidan) muallifiga aylandi.
Xullas, Neymar dastlabki 5ta o‘yinda aqldan ozdiradigan statistikaga erishdi - 8ta gol va 6ta uzatma. Braziliyalik har bir o‘yinda o‘rtacha hisobda 3 martadan zarba berdi. Taqqoslash uchun, uning hujumdagi sheriklarida bu ko‘rsatkich yuqoriroq: Lionel Messi - 4,3ta va Kilian Mbappe - 6ta. Shuningdek, bu oraliqda Karim Benzema («Real») har bir o‘yinda 6tadan, Robert Levandovski («Barselona») va Darvin Nunyes («Liverpul») 4,5tadan zarba berishdi. Demakki, Neymarda zarba effekti balandroq. WhoScored platformasi ma’lumotiga ko‘ra, braziliyalik futbolchi keskin uzatmalar (o‘rtacha - 4,7ta) va o‘ziga nisbatan ishlatilgan qo‘pollik (o‘rtacha - 3ta) bo‘yicha «PSJ» yetakchisi hisoblanadi. Neymarning reyting ochkosi ham fantastika - 9,53. U bu ko‘rsatkich bo‘yicha Yevropaning yetakchi ligalari vakillari orasida mutlaq peshqadam.
Jahon chempionati starti yaqin. Bo‘lajak mundial Neymar uchun jahon chempioni bo‘lish uchun so‘nggi imkoniyatdi balki. Shunday ekan, 30 yoshli futbolchiga joriy mavsum juda muhim. Neymarning o‘zi oldinroq Qatar mundiali uning uchun faoliyatidagi oxiirgisi bo‘lishini istisno qilmagandi. Ko‘rinishidan, braziliyalik bo‘lajak turnirga katta umid bog‘lamoqda va tezlikni ham shunga yarasha oshirmoqda. Fransiya OAVda qayd etilishicha, Neymar ta’til kunlari ham ijtimoiy tarmoqlarda shaxsiy hayoti emas, balki futbol faoliyatini ko‘proq yoritdi. Deylik, mavsumoldi yig‘inidan bir hafta oldin individual tarzda shug‘ullana boshlagani haqida ham yozdi. «Neymar Braziliya termasi bosh murabbiyi Titega bergan va’dasi ustidan chiqmoqda, - deydi braziliyalik jurnalist Juka Kfuri. - U ayni holatda «PSJ»ning barcha futbolchilaridan yaxshiroq ko‘rinmoqda. Maydonda shunchaki, mo‘’jiza ko‘rsatmoqda. Menimcha, Neymar mutlaq yetuk futbolchiga aylandi. Biroq yakuniy xulosa chiqarish uchun CHL o‘yinlarini kutishh kerak. Har holda, bu turnirda qarshilik darajasi Liga 1dagidan ancha yuqori».
Fransiya matbuoti munosabati
L~Equipe: - Neymar — daho! U qoyilmaqom natija ko‘rsatish asnosida bosh rolga qaytdi. Braziliyalik chindan ham, ilhombaxsh futbol namoyish etmoqda.
Liga 1 rasmiy sayti: - Neymar — chempionatning ilk turlarida «PSJ»ning bosh futbolchisi. Ko‘rinishidan, hozir uni to‘xtatish ilojsiz. FootMercato: - Neymar ayni tobda! U katta ishtiyoq bilan o‘ynab, raqiblar himoyasini larzaga solmoqda.
Rarisfans.fr: - 2ta gol va 3ta samarali uzatma, yana 6:1 hisobi qayd etilayotgan vaqtda himoyaga madad berish. Braziliyalikdan yana nima kutish mumkin? Ha, Neymar lol qoldirmoqda («Lill» bilan o‘yindan keyin).
Maxifoot: - Hujumchi futbol dunyosini yana o‘ziga qaratmoqda. Neymar mavsum boshida qoyilmaqom formada. U har bir o‘yinda nur sochmoqda.
A.AHMEDOV tayyorladi
Qizilqum
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
