Sergey Milinkovich-Savich - ko‘p qirrali, jismonan baquvvat yarim himoyachi, taktik jihatdan esa juda aqlli va albatta, Dragan Stoykovich boshqaruvidagi Serbiya milliy jamoasida eng yaxshi ijrochilardan biri.
Uning start chizig‘i tobora yaqinlashayotgan Qatar mundialiga jiddiy hozirlik ko‘rayotgan serb drujinasidagi roli tobora oshib bormoqda. Sergey jumladan, JCH-2028 saralashi «pley-off» bosqichida Krishtianu Ronaldu yetakchiligidagi Portugaliya termasiga qarshi kechgan hal qiluvchi bahsda jamoasi g‘alabasiga katta hissa qo‘shdi. «Lasio» yulduzi Rossiya mezbonlik qilgan avvalgi mundialda ham mamlakat bosh jamoasi tarkibiga kiritilgandi, garchi butun kvalifikasiya jarayonida maydonga tushmagan bo‘lsa-da. «O‘shanda o‘zimni jamoada bo‘lishga to‘liq haqlidek his qilgan emasdim», - dedi Milinkovich-Savich FIFA rasmiy sayti vakillari bilan suhbat boshida. Endi esa u dinamikasi kuchli qiziqarli jamoaning asosiy «murvat»laridan biri hisoblanadi. To‘g‘ri, futbolchining aytishicha, Serbiya termasi binoyidek fazilatlari va afsonaviy murabbiyning aniq ambisiyalariga qaramay, JCH-2022 oldidan kamtarlikni me’yorida ushlab turishi kerak: «Albatta, Qatarga real umidlar bilan borishimiz, raqiblardan aslo qo‘rqmasligimiz kerak. Shuning barobarida katta gapirishdan tiyilishimiz ma’qul». Bir narsa aniq: Milinkovich-Savich va uning jamoadoshlari bo‘lajak jahon chempionatida imkon qadar uzoqqa borish va serblar milliy jamoa bilan faxrlanishlari uchun bor imkoniyatlarini ishga soladilar.
- Sergey, oilangiz tarixi juda qiziqarli va o‘ziga xos. Aytingchi, Serbiyani tanlashingizga aynan nima turtki berdi?
- Ha, Ispaniyada tug‘ilganman, keyin Avstriyada yashadim. Onam serbiyalik, otam esa bosniyalik. Oilamiz bilan ta’til uchun ko‘pincha Serbiyaga yo‘l olardik. Qisqasi, bu mamlakatda yetarli vaqt o‘tkazgan, uni chinakamiga sevib qolganman. Terma jamoa tanlashga to‘g‘ri kelgan payt shu muhabbat o‘z so‘zini aytdi va Serbiya uchun o‘ynashga qaror qildim.
- Hozirgi milliy jamoa ustunlaridan birisiz. Serb futboli vakili bo‘lish siz uchun nimani anglatadi?
- Vatan va yurtdoshlar uchun o‘ynash - futbolchi faoliyatidagi eng muhim jihatlardan biri. Ha, Serbiyada ulg‘aymagan va yashamaganman, lekin takrorlayman, bu yerda oilamiz bilan ko‘p bo‘lganmiz. O‘sha safarlardan faqat ijobiy taassurotlar qolgan. Oddiy aytganda, Serbiya - ona vatanim. Vatan uchun o‘ynash esa sharafdir.
- JCH-2018dan qanday xotiralar bilan qaytgandingiz?
- Oldingi mundial payti ancha yosh edim, boz ustiga, saralash bosqichida qatnashmagandim. Yakunda murabbiy meni jamoaga chaqirdi. Avvaliga ko‘nikishda ancha qiynaldim, chunki o‘sha vaqt o‘zimni tarkibga loyiq futbolchidek his qilolmadim. Muhimi, hammasi juda tez rivojlandi - terma jamoa futbolchilari meni yaxshi kutib olishdi, shu tariqa jamoaga tezda kirishib ketdim.
- Rossiya mundialidan keyingi 4 yil ichida futbolchi sifatida nechog‘li o‘zgardingiz?
- Albatta, o‘zgarish ko‘lami katta. Xususan, o‘yinimning uncha yaxshi rivojlanmagan jihatlarini yaxshiladim. Shubhasiz, hali yana yaxshilanishi zarur elementlar ham yetarli. O‘ylaymanki, vaqt o‘tishi bilan hammasiga ulguraman. Bunda murabbiyga ham ko‘p narsa bog‘liq. Zero, aynan u o‘yinni chuqur tahlil qiladi va siz qaysi yo‘nalishda oqsayotganingizni darhol payqaydi. Umuman, bu dunyoda mutlaq mukammal futbolchining o‘zi yo‘q, lekin takomillikka imkon qadar intilish kerak, albatta.
- Serbiya termasining Qatar-2022 yo‘lidagi asosiy lahzalari sifatida nimalarni tilga olasiz?
- Shubhasiz, avvalo, Portugaliya termasiga qarshi kechgan o‘yinni aytish kerak. Axir hammasi Lissabondagi o‘sha bahsda oydinlashdi. Shuningdek, Irlandiyada bo‘lib o‘tgan o‘yinimiz ham hal qiluvchi maqomda edi, deyarli butun vaqt davomida ustunlikka erishdik, ammo yakunda gol qo‘yib yuborib, durang natija bilan cheklandik. Oqibatda bitta yo‘l qoldi - Portugaliyada g‘alaba qozonish. O‘sha uchrashuv abadiy xotiramda qoladi, zero, Lissabonda imkonsizdek tuyulgan ishni uddaladik. Har holda, hech kim ortga g‘alaba bilan qaytishimizni kutmagan, o‘ylamagandi.
- Hujum harakatida Aleksandr Mitrovich bilan birga o‘ynaysiz. U qanday futbolchi va inson?
- «Mitar»ni anchadan buyon bilaman. 2013 yili Litvada tashkil etilgan U-19 toifasidagi Yevropa chempionatida ham birga to‘p surgandik. Ungacha esa bir yil davomida milliy ligada birga o‘ynaganmiz. Aleksandr - ajoyib do‘st, maydonda juda ko‘p yordam beradi. O‘z navbatida, men ham uni imkon qadar yaxshi vaziyatga chiqarishni o‘ylayman, chunki gol urishi qanchalik muhimligini bilaman. Ishonchim komil, jamoada ichki muhit ideal darajada. Ha, bizda futbolchilarning o‘rtacha yoshi biroz baland, lekin aksariyat yigitlar 5-6 yildan buyon birga o‘ynamoqdalar.
- JCHda ishtirok etish bo‘yicha katta tajribaga ega murabbiy rolini qanday baholaysiz?
- To‘g‘risi, Stoykovich boshqaruvni qo‘lga olgach, yigitlarda ozgina hadik ham yo‘q emasdi. Har holda, bunday taniqli shaxs bilan ishlash haqida o‘ylash... Mana, 1 yildan oshdiki, undan faoliyatim uchun o‘ta zarur narsalarni o‘rgandim, o‘rganyapman. Murabbiyning mashhurligi ham jamoaga naf keltirdi. Harqalay, futbolchilar Dragan jamoaga chindan ham, zarur narsalarni bera olishiga ishonishadi. Xullas, u bor tajriba va bilimini jamoaga berdi, bu saralash bosqichida yaqqol sezildi ham.
- Serbiya milliy jamoasining Braziliya, Shveysariya va Kamerun termalarini o‘z ichiga olgan guruhdan chiqish imkoniyati haqida gapirsangiz...
- Avvalgi JCH guruh bosqichida ham Shveysariya va Braziliya termalari bilan to‘qnash kelgandik. Qur’a natijalari bilan tanishgach, avvaliga biroz ranjidim, chunki jahon forumida xilma-xil raqiblarga qarshi o‘ynash yaxshi, baribir. Lekin ozgina o‘ylab ko‘rgach, bu boradagi fikrim o‘zgardi. Deylik, braziliyaliklarga qarshi to‘p surish har doim alohida voqelik hisoblanadi. Albatta, Qatarda Rossiyadagidan yaxshiroq natija qayd etishni xohlaymiz. To‘g‘risi, hozirda JCH startini, ayniqsa, birinchi o‘yinni ilhaqlik bilan kutyapman. Bitta o‘yinni zabt etib, keyingisini o‘ylash maqsadga muvofiq. Asosiy vazifamiz - guruhdan chiqish, albatta.
Sergey Milinkovich-Savichning otasi bosniyalik, onasi serbiyalik, o‘zi esa Ispaniyada tug‘ilgan. Xalqaro darajada Serbiya sharafini himoya qilish tanlovi - o‘zining shaxsiy tanlovi natijasi. Ha, Sergey tabiiy muhabbati o‘laroq, hech ikkilanmay Serbiyani tanladi va 2015 yili U-20 toifasidagi jahon chempionati finalida Braziliya termasi ustidan 2:1 hisobida qozonilgan g‘alabani tantana qildi. Qarangki, serblar Qatar mundiali ochilish o‘yinida aynan braziliyaliklar bilan kuch sinashadilar.
M.PO‘LATOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
