"Manchester Yunayted" o‘z tarixida ko‘p bor sobiq futbolchilarini qayta sotib olgan. Ammo bu yurishlarning hammasi ham rejadagidek bo‘lavermadi. Jonni Evans o‘sha yulduzlarning so‘nggisidir. 35 yoshli himoyachi Erik ten Xag jamoasi bilan qisqa muddatli shartnoma tuzgan edi. Evans "MYU" tarbiyalanuvchisi hisoblanadi. U o‘zining birinchi davrida asosiy tarkib futbolchisi bo‘lgan va maydonga 200 dan ortiq bahslarda tushirilgan. Himoyachi o‘shanda klub bilan 6 ta titul yutishga erishgandi. Bu titullar ichida APL va YECHL bor. Quyida Evans kabi "qizil iblislar" safiga qaytgan bir nechta futbolchilarni bilib olasiz. Ularning ketma-ketligi ikkinchi davrining muvaffaqiyatiga ko‘ra belgilandi.
Tom Xiton
Xiton ham xuddi Evans singari klub tarbiyalanuvchisi edi. U asosiy jamoada birorta bahsda maydonga tushmay, 2010 yilda erkin agent sifatida klubdan ketadi. Darvozabon orada "Kardiff Siti", "Bristol Siti", "Byornli" va "Aston Villa"da faoliyat yuritdi. Birmingem klubini 2021 yilda tark etgan Xitonni "MYU" olib keladi. Futbolchi 2021 yilning dekabrida YECHL doirasidagi "Yang Boyz"ga qarshi bahsda debyut qilgandi. 37 yoshli futbolchi yaqinda "Lion"ga qarshi o‘tgan o‘rtoqlik bahsida ham asosiy tarkibda maydonga tushdi.
Pol Pogba
Pogba 2010 yilda "MYU" yoshlari bilan Angliya kubogiga ega chiqadi. Ammo u Fergyuson jamoasida 7 tagina bahsda maydonga tushdi. 2012 yilning yozida Pogba erkin agent sifatida mankunianliklar safini tark etishga majbur bo‘ladi. Fransiya terma jamoasi a’zosi "Yuventus"da porlagan edi. Buni ko‘rgan "MYU", uni 89 million funt evaziga sotib oladi. Klub tarixidagi eng qimmat transfer hisoblangan yarim himoyachi 2022 yilda ikkinchi bor tekinga qo‘yib yuborilgan edi. Pogba yana jonajon "Yuventus"iga qaytdi.
Krishtianu Ronaldu
Ronaldu "MYU"dagi birinchi davrida uchta APL va YECHL bosh sovrinini yutgan edi. U 2009 yilda rekord summada "Real"ga transfer qilinadi. Oradan 10 yildan ortiq vaqt o‘tdi va hujumchi yana Angliyaga qaytadigan bo‘ldi. "Manchester Siti" bilan muzokaralardan keyin, hammasi o‘zgarib ketdi. Oraga "MYU" aralashib, Ronalduni o‘ziniki qildi. Portugaliyalik qaytish mavsumida fantastik daraja ko‘rsatdi va mavsumni to‘purar sifatida yakunladi. Garchand 24 ta gol urgan bo‘lsa ham, uning jamoasi tarixdagi eng past natijani ko‘rsatgandi. Hammasini to‘g‘irlash uchun olib kelingan Erik ten Xag esa ishni Krishtianu Ronalduni yo‘qotishdan boshlaydi. Afsonaning klubdan ketishi chiroyli bo‘lmadi. Afsuski, bu – haqiqat.
Pol Skoulz
Skoulzning "MYU"dagi birinchi davri juda ham shonli kechgan. Jamoadan ketishidan oldin u 2011 yilgi YECHL finalida "Barselona"ni taslim etishda katta yordam beradi. Yarim himoyachi futboldan ketishini e’lon qilgandi. Ammo oradan yetti oy o‘tgach, uning nomi yana "MYU" tarkibida, bo‘libam, "Manchester Siti"ga qarshi o‘yinda paydo bo‘ldi. Skoulz "qizil iblislar" safida o‘ynashni davom ettirdi. Yana 41 ta o‘yindan keyin, u ketdi. Ammo bu ketish 2013 yilda, yigirmanchi APL tituli qo‘lga kiritilgach ro‘y berdi.
Mark Xyuz
"MYU" akademiyasidan chiqqan futbolchi 1986 yilga qadar 121 ta o‘yinda 47 ta golga mualliflik qiladi. Xyuz o‘sha yili yozda, "Barselona"ga yo‘l olgandi. "Kamp Nou"da biror ishni qoyillatmagan hujumchi 1988 yilda Ser Aleks Fergyuson tomonidan yana "MYU"ga olib kelinadi. Xyuz shundan keyin yana besh yil "qizil iblislar" bilan birga bo‘ldi. Bu vaqt davomida u 116 ta golga mualliflik qilib, 2 ta APL, 2 ta Angliya kubogi, bitta liga kubogi va kubok egalari kubogiga ega chiqadi. Xullas, afsonaviy hujumchi 90 yillardagi "MYU" ramzlaridan biriga aylana oldi.
ISMATOV J.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
