«Dinamo» bosh murabbiyi Vadim Abramov Superliganing 19-turidan o‘rin olgan «Paxtakor»ga qarshi uchrashuvdan (1:1) keyingi matbuot anjumanida jurnalistlar savollariga javob berdi.
— Vadim Karlenovich, jangovar o‘yin va durang. Uchrashuv haqida fikringiz?
«Avvalo, barchani bayram bilan tabriklayman. Bunday kunda futbolchilar ham muxlislarga bayram kayfiyatini ulashishi kerak edi. Menimcha, o‘yin tomoshabinlarga yoqdi. Har ikki jamoada ham g‘alaba qozonish imkoniyati bo‘ldi. Umuman, durangga mos bahs kechdi, deb o‘ylayman.
Alamlisi, o‘z maydonimizda ochko yo‘qotdik. Endi keyingi o‘yinlarda g‘alaba qozonib, yo‘qotilgan ochkolar o‘rnini to‘ldirishimiz kerak».
— «Neftchi» va «Paxtakor» kabi yetakchi jamoalardan ochko olishni munosib natija deb hisoblash mumkinmi?
«Bu masalaga qaysi tomondan qarashga bog‘liq. To‘g‘ri, yetakchilarga qarshi o‘yinlarda yutqazmadik. Ammo boshqa tomondan, o‘z maydonimizda, muxlislarimiz qarshisida o‘tkaziladigan bahslarni yutishimiz kerak».
— Anvarjon Hojimirzayev bugun ham maydonga tushmadi. Uning holati qanday?
«Afsuski, Anvarning jarohati hali ham bezovta qilyapti. Shu sababli tavakkal qilmadik. Davolanishda davom etadi, keyingi o‘yin oldidan holatini yana baholaymiz. Bugun uning yo‘qligi, shubhasiz, sezildi. Hozircha zaxira imkoniyatlarimiz shunday».
— «Paxtakor»dek katta maosh oladigan futbolchilari bor jamoaga qarshi o‘ynash oson emas. Yetakchi futbolchingiz yo‘q paytda qolganlarni qanday ruhlantirasiz?
«Kuchli jamoaga qarshi futbolchini yana qanday ruhlantirish mumkin? Bunday o‘yinlarda futbolchilarning o‘zi yetarlicha motivasiyaga ega bo‘ladi. O‘zingiz ularning qancha maosh olishini aytdingiz. Bizning yigitlar ham o‘zlarining ulardan kam emasligini isbotlashga harakat qiladi. Lekin hasad yaxshi narsa emas. Bunday fikrlarni chetga surib, maydonga chiqib futbol o‘ynash kerak».
— Abdug‘afur Haydarov o‘yinga qo‘shildi, ammo keskin burilish yasay olmadi. Uning harakatlariga qanday baho berasiz?
«Haydarov o‘yinni o‘z zimmasiga olishni va doim darvozaga zarba berishni yaxshi ko‘radigan futbolchi. U menga Kerjakovni eslatadi — har doim zarba berishga intiladi. Jamoaga yaqinda qo‘shildi va hali moslashish jarayonida. Uning taktikamizga to‘liq moslashishini kutyapmiz».
— O‘yin davomida Edem Nemanovdan bir necha bor norozi bo‘lgandek ko‘rindingiz. Bu nima bilan bog‘liq edi?
«Men faqat uning to‘pni tezroq o‘yinga kiritishini xohladim. Ayrim vaziyatlarda u bu borada sekin harakat qildi. Lekin maydon tashqarisida turib gapirish oson. Maydon ichida esa qarorni futbolchilarning o‘zi qabul qiladi», — dedi Vadim Abramov.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
