Argentina terma jamoasi sardori Lionel Messining xalqaro o‘rtoqlik uchrashuvlaridagi ishtiroki so‘roq ostida. Shu sababli terma jamoa rasmiylari Xitoydagi uchrashuvlarni o‘tkazish bo‘yicha muzokaralarni qayta boshladi.
Sentyabr oxiri va oktyabr boshlarini qamrab oluvchi navbatdagi kuzgi xalqaro tanaffus FIFA qoidalariga ko‘ra, terma jamoalarga to‘rttagacha o‘rtoqlik uchrashuvi o‘tkazish imkonini beradi. Biroq 2026-yilgi Jahon chempionati finalidan so‘ng terma jamoaning navbatdagi yig‘inigacha bir oydan kam vaqt qolganiga qaramay, Argentina futbol assosiasiyasi hozircha birorta uchrashuvni rasman tasdiqlamadi.
ESPN Argentina insayderi Esteban Edulning xabar berishicha, xitoylik promouterlar Argentina terma jamoasigan Osiyoda bir nechta o‘rtoqlik uchrashuvlarini o‘tkazish bo‘yicha yirik moliyaviy taklif yuborgan. Biroq tashkilotchilar shartnomaga Messi ushbu o‘yinlarda maydonga tushishini kafolatlovchi bandni kiritishni talab qilgan. Argentina futbol assosiasiyasi esa bunday kafolatni bera olmagani sababli dastlabki kelishuv amalga oshmagan.
FIFA qoidalariga ko‘ra, bitta xalqaro tanaffus doirasidagi o‘rtoqlik uchrashuvlari bir geografik hududda o‘tkazilishi va jamoalarning uchrashuvlar oralig‘idagi parvozi ikki soatdan oshmasligi kerak. Shu sababli o‘yinlarni Osiyo va Janubiy Amerikaga bo‘lib o‘tkazish imkoniyati mavjud emas. Barcha uchrashuvlarni Argentina hududida tashkil etish varianti ham ko‘rib chiqilgan, biroq AFA rahbariyati yuqori saviyadagi raqiblar yetishmasligi sababli bu taklifni rad etgan.
Edulning ma’lumotlariga ko‘ra, AFA Xitoy vakillari bilan Xitoy va mintaqadagi boshqa terma jamoalarga qarshi bir nechta o‘rtoqlik uchrashuvlarini o‘tkazish bo‘yicha muzokaralarni qayta boshlagan.
Messining o‘yinlarda qatnashishini kafolatlash masalasi esa muzokaralardagi asosiy to‘siq bo‘lib qolmoqda. Bu talab rejalashtirilayotgan turnening moliyaviy shartlariga ham bevosita ta’sir ko‘rsatmoqda.
Argentina 2026-yilgi Jahon chempionati finalida Ispaniyaga mag‘lub bo‘lganidan so‘ng Messi muxlislarga samimiy murojaat yo‘lladi, biroq “Albiseleste” safidagi kelajagi haqida hozircha aniq ma’lumot bermadi.
Argentina futbol assosiasiyasi rahbariyati hujumchini 2028-yilgi Amerika Kubogigacha terma jamoada saqlab qolishga umid qilmoqda. Biroq Messi yana Argentina terma jamoasi libosini kiyadimi yoki yo‘q — bu qaror hozircha faqat “Inter Mayami” hujumchisining o‘ziga ma’lum.
Argentina Xitoyda O‘zbekistonga qarshi o‘ynaydimi?
Bo‘lajak xalqaro tanaffus uchun raqiblarni aniqlash butun dunyoda jamoalar uchun jiddiy muammoga aylangan. Yevropa terma jamoalari Millatlar ligasidagi uchrashuvlar bilan band bo‘lgani sababli, Argentina uchun potensial raqiblar doirasi sezilarli darajada toraygan.
Shu sababli O‘zbekiston terma jamoasiga qarshi ehtimoliy uchrashuv varianti paydo bo‘lgan. Biroq hozircha uning ayrim tafsilotlari rasman tasdiqlanmagan.
Avvalroq “oq bo‘rilar” 30-sentyabr kuni Xitoyda Argentina terma jamoasiga qarshi o‘rtoqlik uchrashuvida maydonga tushishi mumkinligi haqida xabar berilgan edi.
O‘FA va AFA hozircha bu ma’lumotni rasman tasdiqlamagan. Shunga qaramay, uchrashuvning Xitoyda o‘tkazilishi Argentina terma jamoasining Osiyo turnesi bo‘yicha rejalari va belgilangan geografik talablarga mos keladi.
Ma’lumot uchun, Fabio Kannavaro boshqaruvidagi milliy jamoa 24-sentyabr kuni Farg‘onada Eron, 6-oktyabr kuni safarda Koreya Respublikasiga qarshi bahs olib boradi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
