Italiya Milliy hakamlar komissiyasi (CAN) rahbari Daniele Orsato qoidabuzarliklarni qayd etish va VAR tizimida ishlash bo‘yicha yangi yondashuv A Seriya o‘yinlarining borishiga ta’sir ko‘rsatganini tasdiqlovchi ma’lumotlarni taqdim etdi, deb xabar beradi Football Italia.
2026 yil yozidan beri italiyalik hakamlar haddan tashqari ko‘p jarima zarbalari belgilanayotgani bo‘yicha o‘yinchilar va murabbiylar tomonidan bildirilgan tanqidlardan so‘ng, o‘yinga erkinroq yondashishlarini bildirishmoqda. Ortiqcha xushtaklar, o‘z navbatida, o‘yinlar sur’atini sekinlashtirayotgan edi, bu ayniqsa Italiya jamoalari Yevropa kuboklarida o‘ynaganida yaqqol ko‘zga tashlanardi.
Shunday qilib, 2026/27 yilgi mavsumda o‘yindagi to‘pga egalik qilishning o‘rtacha vaqti endi 59 daqiqayu 31 soniyani tashkil etmoqda — bu oxirgi 2 mavsumga qaraganda 5,5 daqiqadan ko‘proqdir.
O‘rtacha har bir o‘yinda 26,23 o‘rniga 22,6 ta qoidabuzarlik qayd etilmoqda — bu hatto ushbu mavsumdagi Premyer-liga ko‘rsatkichidan ham (23,28) kamroqdir.
A Seriyada ushbu mavsumda bor-yo‘g‘i 2 ta penalti belgilandi, solishtirish uchun: 2025/26 yilgi mavsumning ushbu bosqichida 9 ta, 2024/25 yilgi mavsumda 14 ta va 2023/24 yilgi mavsumda 16 ta penalti belgilangan edi.
Sariq kartochkalar soni har bir o‘yin uchun 3,53 tadan 3,03 tagacha kamaydi, qizil kartochkalar esa 2 tani tashkil etmoqda (2023/24 va 2024/25 yilgi mavsumlarning ushbu bosqichidagi 6 ta va o‘tgan mavsumdagi 5 taga nisbatan).
Eng katta o‘zgarish VAR pauzalari bo‘yicha yuz berdi: ushbu mavsumda maydonda monitor orqali ko‘rish holati bor-yo‘g‘i 1 marta yuz berdi, avvalgi mavsumlarda esa tegishlicha 6 va 8 tani tashkil etgan edi.