«Real» vakili Dani Karvaxal Radioestadio Noche dasturida mehmon bo‘lib, «Qirollik klubi»dagi umumiy holat haqida gapirib berdi. Ispaniyalik futbolchi jumladan, Vinisius o‘yiniga bog‘liq o‘zgarishlarni fantastikaga qiyosladi, yana Kilian Mbappening Madridda ko‘rinishi ehtimoli yuzasidan fikr bildirdi.
Jamoaning qishki transferlar bozoriga kirmaganiga munosabat
- O‘ylaymanki, klub to‘g‘ri yo‘ldan ketyapti. Chunonchi, bizda kuchli tarkib bor. Demakki, xaridlarga qo‘l urilmaganidan xavotirlanishga asos yo‘q.
Rafael Nadal yutug‘iga munosabat
- Australian Open turniri finalini tomosha qilib, yosh bolalardek quvondim, sakradim. Nadalga gap yo‘q, shunchaki, respekt!
COVID xurujiga munosabat
- Koronavirusga topshirgan test tahlili salbiy natija berganidan keyin ham kardiolog bizni alohida tekshiradi. Jumladan, men boshida xastalikning qandaydir alomatini sezmadim. To‘g‘ri, keyinchalik bir necha kun davomida isitma tushmadi va holsizlik kuzatildi. Tabiiyki, mashg‘ulotlarga qaytgach, odatiy ritmga tushish borasida birozgina qiynaldim.
S.Arabistonidagi ijobiy testga munosabat
- Ispaniya superkubogi yarim finalidan keyin o‘zimni horg‘in his qildim. Buni avvaliga tabiiy holat sifatida ko‘rdim, harqalay, og‘ir o‘yin ancha kuch oldi. Lekin ertasiga tana harorati birdan ko‘tarilib ketdi va test tahlili ijobiy natija ko‘rsatdi. Qisqasi, karantin tartibiga ko‘nikishdan o‘zga choram qolmadi. Chunki bunday holatda mas’uliyatni to‘liq anglab, izolyasiya sharoitiga amal qilish talab etiladi. Shu tariqa faqat WhatsApp orqali jamoani qo‘llab-quvvatlashimga to‘g‘ri keldi.
Muntazam jarohatlarga munosabat
- Agar jismoniy zo‘riqishlar qayerdan kelib chiqayotganini bilganimda, shubhasiz, unga qarshi chora izlardim. Albatta, jarohat pand bermasligi uchun hammasiga tayyorman. Zero, chetda qolsangiz, o‘z-o‘zidan asabiylashasiz, buning ortidan qiyinchiliklar yuzaga chiqadi. Umuman, menda barchasi o‘zgardi: ovqatlanish, dam olish va uxlash tartibi, o‘yinga tayyorgarlik masalasi... Stress holatidan chiqish uchun ruhiy xotirjamlik ham muhim.
La Ligadagi raqobatga munosabat
- Oldinda o‘yinlar ko‘p, «Sevilya» ta’qibni davom ettirmoqda va oxirigacha kurashishi aniq.
Kilian Mbappening ehtimoliy transferiga munosabat
- Mbappe qoyilmaqom futbolchi. Mana, «PSJ» bilan shartnomasi nihoyasiga yetyapti, demak, «Real» libosini kiyishi mumkin. Ammo hozircha bo‘lajak o‘yinda uni qanday to‘xtatish haqida o‘ylashimiz kerak.
Vinisius o‘yiniga munosabat
- Undagi o‘zgarish sababini men ham bilmayman, hammamiz hayratdamiz. Vini gollar kelishini bilardi va o‘sha vaqt yetdi, chog‘i.
Bo‘lajak JCHga munosabat
- Farzandim dunyoga kelganidan buyon uning sog‘lom va baxtli bo‘lib ulg‘ayishini xohlayman. JCHda ishtirok etish - baxt. Lekin hozircha «Real» bilan muvaffaqiyat qozonish va sovrinlar yutishni ko‘proq o‘ylayapman. Mavsum tugasin, keyin JCHga e’tibor qaratamiz.
Taqvimga munosabat
- Taqvim juda tig‘iz. Menimcha, hozir jahon chempionatini har 2 yilda o‘tkazish g‘oyasiga rozi futbolchining o‘zi yo‘q, lekin qarorni biz qabul qilmaymiz...
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
