Magnus Karlsen Parij shahrida o‘tkazilgan 2026-yilgi Esports World Cup turniri finalida 19 yoshli belaruslik grossmeyster Denis Lazavikni finalda mag‘lub etib g‘oliblikni qo‘lga kiritdi. Karlsen musobaqani guruh bosqichidan boshlab pley-offgacha birorta ham partiyada mag‘lub bo‘lmasdan turnirni yakunladi.
Team Liquid safida ishtirok etgan Karlsen Lazavikni ishonchli tarzda mag‘lubiyatga uchratdi. Norvegiyalik grossmeyster har ikki setda 3:1 hisobida raqibidan ustun keldi.
“Men Denisning o‘yinlarini kuzatdim va murabbiylar bilan gaplashdim. Ayniqsa, Hikaru qo‘llagan yondashuv to‘g‘ri bo‘lmaganini his qildim. Qizig‘i shundaki, men uning endshpillarda himoyalanishi unchalik kuchli emasligini aytgandim. Shuning uchun Hikaru kabi xatoga yo‘l qo‘ymasdan, vaziyatni yaxshiroq ushlab turishim kerak deb o‘yladim”, dedi dunyoning birinchi raqamli shaxmatchisi kibersport bo‘yicha Jahon chempionatidagi g‘alabadan so‘ng.
Karlsen Lazavik bilan avvalgi o‘yinlarda yo‘l qo‘ygan xatolarini ham eslab o‘tdi:
“Men Denis bilan internetda ko‘p marta o‘ynaganman. O‘sha o‘yinlarda tavakkal qilib, buning uchun jazolanganman. Shu sababli unga aniq pozision ustunlik berishga harakat qilmadim”.
Karlsen avval chorakfinalda hindistonlik grossmeyster Nihal Sarinni 2,5:0,5 hisobida mag‘lub etgan bo‘lsa, yarimfinalda fransiyalik shaxmatchi Alireza Firuzjani 4:1 hisobida taslim etdi.
Karlsendan mag‘lubiyatga uchrashi mumkinligini his qilgan paytlari bo‘lgan-bo‘lmaganini so‘rashganda, u shunday javob berdi:
“Albatta, shunday vaziyatlar bo‘ldi. Alirezaga qarshi bir necha bor, Nihalga qarshi ham shunday holatlar yuzaga keldi. Ayrim xavfli vaziyatlar bo‘lgan, ammo turnirni mag‘lubiyatsiz yakunlaganimdan juda xursandman. Men noodatiy narsa qilishga urinmadim. Imkoniyatlardan foydalanishga, bir oz tavakkal qilishga harakat qildim va bundan mamnunman”.
Ma’lumot uchun, musobaqada NAVI (Natus Vincere) jamoasi nomidan ishtirok etgan O‘zbekistonning ikkinchi raqamli grossmeysteri Nodirbek Abdusattorov chorakfinalda Denis Lazavik bilan bahs olib bordi. Dastlabki to‘rtta partiyada g‘olib nomi aniqlanmadi. Shundan so‘ng, armaggedon bahsida Lazavik g‘alaba qozondi hamda keyingi bosqichga yo‘l oldi.
O‘zbekistonlik shaxmatchi bu turnirdagi natijasi evaziga 75 ming dollar pul mukofotini qo‘lga kiritdi.
Shaxmatchilar turnirda “10+0” ya’ni rapid formatida bahslashdi. Turnirning sovrin jamg‘armasi 1,5 million AQSH dollarini tashkil etdi va g‘olib 250 ming dollarga ega bo‘ldi. Karlsen 2025 yilgi Esports World Cup musobaqasida ham bosh sovrinni qo‘lga kiritgan edi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
