TIXANA NEMCHICH: «ERKAKLARGA BAQIRISh NOQULAY, AMMO SHUNGA MAJBURMAN!»
Baho:
+0; -0
TIXANA NEMCHICH: «ERKAKLARGA BAQIRISh NOQULAY, AMMO SHUNGA MAJBURMAN!»
Futbol — erkaklar o‘yini. Ma’lum muddatgacha bu tushuncha hukmron bo‘lib keldi. Ammo keyinchalik ayollar futboliga asos solingach, mazkur tushuncha o‘zgardi. Shunda ham ayollar erkaklar futboliga, erkaklar esa ayollar futboliga aralashmasdi. Biroq yaqinda ayollar jamoalarini erkak murabbiylar boshqara boshladi. Bu tushunarli, albatta. Lekin ayol murabbiyning erkak futbolchilardan iborat jamoalarni boshqarishiga nima deysiz? To‘g‘ri, bir qarashda erkaklarga buyruq berayotgan ayolni tasavvur qilish qiyin. Biroq, buni qarangki, xorvatiyalik Tixana Nemchich bu holatni oddiy voqelikka aylantirdi. Ya’ni u dunyo futbolidagi birinchi ayol murabbiy, aniqrog‘i, erkak futbolchilardan tuzilgan klubni boshqarishni zimmasiga olgan ilk ayol murabbiy hisoblanadi.
Tixana Nemchich 1988 yilning 20 yanvarida Xorvatiyada tavallud topgan. O‘z vaqtida Xorvatiya terma jamoasida to‘p surgan, shu bilan birga fotomodel sifatida ham faoliyat yuritgan. Ayni paytda esa u Xorvatiya chempionatining 5-divizioni ishtirokchisi hisoblangan «Viktoriya» klubini boshqarib kelmoqda.
FUTBOLCHILIKDAN MURABBIYLIKKA
Tixana professional futbolchi sifatida o‘z vaqtida Xorvatiyaning «Agram» va «Dinamo» jamoalarida harakat qilgan. Yashil maydonda 10 yilga yaqin to‘p surgan. Xorvatiya terma jamoasi safida esa 5 ta rasmiy o‘yinda maydonga tushgan. U futbolchilik faoliyatini uzoq vaqt davom ettirishi mumkin edi, lekin 2012 yilda tizzasidan olgan jarohati bunga xalal berdi. Futbolchi sifatida maydonga boshqa tusha olmasligini bilgan Tixana butsasini mixga ilishga majbur bo‘ldi. Ammo futboldan uzoqlashmadi, hozirgacha bosh murabbiylik bilan shug‘ullanib kelmoqda. Tixana Zagreb universitetida o‘qib yurganidayoq bu jamoa bilan tanish edi. U shu jamoada futbol olamidagi karyerasini yangi bosqichga olib kirdi.
BU MENING ISHIM
Tabiiyki, Tixananing erkaklar klubini boshqarishi jamoatchilikning e’tiborini tortmay qolmadi. Ommaviy axborot vositalarida u haqda ko‘plab maqolalar, Tixana bilan bo‘lgan intervyular chop etila boshlandi. Unga beriladigan savollarning aksariyati quyidagi mazmunda edi: «Erkak futbolchilarga so‘zingiz o‘tadimi?» Bu savollarga Tixana quyidagi mazmunda javob qaytargan: «Albatta. Chunki futbolchilar menga ayol emas, murabbiy sifatida qarashadi. To‘g‘ri, erkaklarga baqirib, buyruq berish, ularni boshqarish mushkul ish. Ammo bu mening vazifam, uni bajarishga majburman. Umuman olganda, bundan afsuslanmayman. Biz hammamiz professionalmiz».
GO‘ZALLIK OLAMIDA
Futboldan tashqari, Tixana o‘zini modellikda ham sinab ko‘ra boshladi. U 2008 yilda o‘tkazilgan «Xorvatiya sport go‘zallari» tanlovida finalga qadar yetib borgan. Shuningdek, ko‘plab kompaniyalarning reklama roliklarida va ayollar jurnallari muqovalari uchun ham suratga tushgan.
Kiritilgan sana: 26.06.2017 23:17. O'kildi: 4760 marta.
Paxtakor
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
