Portugaliya terma jamoasi Yevropa chempionati arafasida Lissabonda Isroilga qarshi o‘rtoqlik uchrashuvini o‘tkazib, yirik hisobda g‘alaba qozondi.
Birinchi bo‘lim tugashiga 3 daqiqa qolganida Brunu Fernandesh hisobni ochgan bo‘lsa, oradan 2 daqiqa o‘tib Krishtianu Ronaldu hisobdagi farqni oshirdi. Mazkur gol "Yuventus" forvardi uchun terma jamoa safidagi 104-gol bo‘ldi (jahon rekordigacha 5ta gol qoldi).
Portugaliyaliklar bahsning so‘nggi daqiqalarida raqib darvozasiga yana 2 marta yo‘l topishdi. Dastlab Joau Kanselu raqib darvozasini ishg‘ol qilgan bo‘lsa, qo‘shib berilgan daqiqalarda Fernandesh dublni rasmiylashtirdi.