Grandlar mavzusi tilga olinganida, daniyaliklar «Kopengagen» va «Midtyullann»ni tasavvur etadilar. Biroq «Norshellann» a’zolari bunga qo‘shilishmaydi.
Garchi bu jamoa natijalar bo‘yicha faqat joriy mavsumda yuqorida zikr etilgan raqiblaridan o‘zib ketgan bo‘lsada, yosh iqtidorlar soni bo‘yicha allaqachon yuksak darajaga chiqib ulgurgan. Muhammad Quddus, Mikkel Damsgor va Kamol Sulaymonlar hozir nomdor jamoalarda to‘p surishmoqda, lekin ilk saboqlarni aynan «Norshellann»da olishgan. Bu klub asosiy e’tiborni yoshlarga qaratadi va bu o‘z samarasini bermoqda. Xo‘sh, o‘tgan mavsumda jon saqlash uchun kurashgan jamoani favorit maqomiga olib chiqqan va endi o‘zlarini skautlar nazaridan olib qochishga urinayotgan yosh iqtidorlar kimlar?
«Norshellann» - Yevropadagi eng yosh klub
Daniya chempionatida yetakchilik qilayotgan jamoaning asosiy qudrati - yosh o‘yinchilar. Tarkibning o‘rtacha yoshi 22,3, o‘yin vaqtining 73,7 foizida 21 yoshdan kichik o‘yinchilar to‘p surmoqdalar. Taqqoslash uchun keltiradigan bo‘lsak, top-chempionatlar vakillari orasida eng yuqori ko‘rsatkichga erishgan «Barselona»da umumiy o‘yin vaqtining 29,5 foizini yosh iqtidorlar band etishgan.
Odatda «Norshellann» turnir jadvalida bu qadar yuqori ko‘tarilgan emasdi - joriy mavsum rostakam parvozni namoyish etdi. O‘tgan mavsumda jamoa autsayderlar safida edi: hozirgi yetakchilar sinovda edilar, endi ular har oyda chempionatning eng yaxshi futbolchisi unvonini qo‘lga kiritmoqdalar. Andreas Shelderup, Ernest Nuama, Mads Bidstrup va Adamo Nagalo - yosh iqtidorlar ro‘yxatini davom ettirish mumkin. Keling, yaxshisi, ular bilan tanishaylik.
Andreas Shelderup - «Liverpul»ni rad etgan yetakchi
Ehtimol, Andreas jamoaning asosiy nyusmeykeridir. U ham skandinav, faqat daniyalik emas, norvegiyalik. Ixtisosi vinger, ammo oldingi chiziqda ham o‘ynay oladi. Joriy mavsumda 10ta gol bilan to‘purarlar ro‘yxatini boshqarib bormoqda. 16 yoshida Andreas PSV, «Ayaks», «Atalanta», «Yuventus», «Bavariya» va «Liverpul»da ko‘rikdan o‘tgan, «qizillar» uni o‘z akademiyalariga taklif etishgandi. Biroq norvegiyalik to‘satdan paydo bo‘lgan «Norshellann»ga yo‘l oldi: «Angliyada 17-19 yoshlilar orasida yurgandan, bu yerda asosiy tarkibda o‘ynash yaxshiroq».
Andreas juda mehnatsevar yigit. Murabbiylar hatto uning qo‘shimcha mashg‘alotlarini cheklab qo‘yishga majbur bo‘lganliklarini tan olishgan. U asosan o‘ng oyoqda to‘p sursada, chap oyog‘i ham juda chaqqon, raqiblarini aldab o‘tishda qo‘l keladi. Aynan ajoyib driblingi uchun uni Eden Azar va Jek Grilishga qiyoslashadi. Andreas Andres Inyestani o‘z «kumir»i deb biladi. Shuningdek, Martin Edegor va Erling Xolandning o‘yinlariga yuksak baho beradi. Yaqin kelajakda u vatandoshi bilan yonma-yon to‘p surishi mumkin - APL toplari qishda uni o‘z saflariga qo‘shib olish niyatidalar. «Sevilya»ning 10 mln. yevrolik taklifini «Norshellann» rad etdi.
Yarim himoya chizig‘ining ijaradagi yetakchisi - Mads Bidstrup
Mads 21 yoshda. Angliyada ishi yurishmagach, «Brentford» yarim himoyachisi 2022 yil yanvarida ijara asosida «Norshellann»ga yo‘l oldi va shu vaqt ichida jamoa yetakchilaridan biriga aylandi. U to‘pni raqibidan tortib olganidan keyin hujum uyushtirishni xush ko‘radi. Bu borada 56 ball bilan chempionat peshqadami bo‘lsada, samarali uzatmalari bilan maqtana olmaydi. Ammo o‘z jamoadoshlarini bor kuch-mahoratlari bilan o‘ynashga ruhlantira oladi. Shu tufayli mutaxassislar uni Daniya chempionatidagi eng omadli transfer sifatida e’tirof etmoqdalar. Agar Mads mavsumni muvaffaqiyatli yakunlasa, «Brentford»da ishlari yurishib ketishi va yuksakroq cho‘qqilarga ko‘tarilishi hech gapmas.
Ernest Nuama - Qatarda terma jamoasiga yordam bergan ganalik iqtidor
O‘tgan yili Gana futbol akademiyasidan o‘zaro shartnomaga asosan «Norshellann»ga kelgan 18 yoshli vinger ham joriy mavsumda yorqin o‘yinlarni namoyish etdi. Darvoqe, undan avvalroq Muhammad Quddus va Kamol Sulaymon ham mazkur kelishuvga binoan Daniya klubidan joy olishgandi.
Ernest ko‘proq o‘ng qanotda o‘ynaydi, ammo markaziy hujumchi rolini ham uddalay oladi. O‘tgan mavsum oxirida asosiy tarkibga kelgani bois, bor mahoratini namoyish etishga ulgurmagandi. Joriy mavsumdagi 17 uchrashuvda 5ta gol va 3ta assist bilan Gana terma jamoasining kengaytirilgan tarkibidan joy oldi. Dribling va tezkorlik - Ernestning ustun jihatlari. U o‘z vaqtida oldinga intiladi va aldamchi harakatlari bilan raqiblarini shoshirib qo‘yadi. Mavsumning hal qiluvchi bosqichini muvaffaqiyatli o‘tkazsa, yozda top-chempionatlar klubiga yo‘l olishi aniq.
Adamo Nagalo - imkoniyatdan foydalangan burkina-fasolik himoyachi
20 yoshli himoyachi 2 yil avval Gana futbol akademiyasidan Daniyaga kelgandi. «Norshellann»da to‘p surish imkoniyatiga u o‘tgan mavsumda ega bo‘ldi: elitadagi o‘rnini saqlab qolishga intilgan jamoa boshqa himoyachini qishda o‘z tarkibiga jalb etgandi. Biroq chempionatni davom ettirishga ikki hafta qolganida, u jarohat oldi. Murabbiyda navqiron Adamoga ishonch bildirishdan boshqa yo‘l qolmagandi. Yosh himoyachi bu imkoniyatdan unumli foydalandi - himoya markazidan mustahkam o‘rin olib, raqobatchiga imkon qoldirmadi. Joriy mavsumda esa Nagalo boshlang‘ich tarkibning doimiy a’zosiga aylanib, 33 yoshli Kian Xansen bilan ishonchli duetni tashkil etdi. Buning samarasi evaziga «Norshellann» ortda qolgan 17 uchrashuvda atigi 13ta gol o‘tkazib yubordi. Bu Daniya chempionatidagi eng yuqori ko‘rsatkich.
Yozda Adamo Nagalo «Fenerbaxche» tarkibiga o‘tib ketishi mumkin edi. Biroq himoyachi Daniyada qolishni afzal ko‘rdi. Maqsadi: Angliya yoki Germaniyada to‘p surish. Mavsum yakunida uning orzusi ham ro‘yobga chiqsa, ajablanmaymiz. Qisqasi, noyob iqtidorlar top-klublarda emas, kamtarin jamoalarda shakllanadilar. Kamtarga kamol hikmatining futboldagi tasdig‘i.
A.AHMEDOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
