Yurtimizda xokkey o‘ynash uchun imkoniyatlar yaratilmoqda
Baho:
+0; -0
Yurtimizda qish faslining ikkinchi oyi ham o‘tib bormoqdaki, hali uning gashtini tuyib ulgurmadik. Ahyon-ahyonda yoqqan qor esa zaminni oqartirdi-yu. ammo ko‘zimiz to‘yadigan zavq bag‘ishlay olmadi bizga.
Bolalik paytimda qishni orziqib kutardik. Ayniqsa, qalin qor yoqqanda yaxmalak ustida uchishning gashti o‘zgacha edi. U yer bu yerdagi ko‘lmakcha yoki hovuzlar ustini qalin muz qoplagan chog‘larda tengqurlarimiz bilan maza qilib xokkey o‘ynardik.
To‘g‘ri, bugun ham qishning gashtini tuyishni istagan yurtdoshlarimiz Chimyon tog‘lariga chiqishi, qor ustida miriqib chana uchishi, kumush faslning haqiqiy zavqini his qilishlari mumkin. Lekin, hamma ham Chimyon tog‘lariga chiqolmaydiku. Xo‘sh, bunday toifadagi insonlar farzandlariga haqiqiy qishning gashtini qanday ulashishi mumkin?
Tez orada foydalanishga topshiriladigan “Xumo” ko‘p tarmoqli sport-sog‘lomlashtirish majmuasi va uning muz maydoni esa poytaxtimiz aholisining ana shu talabini qondirishga xizmat qiladi. Biroq, ungacha Toshkentda istiqomat qilayotgan yurtdoshlarimiz uchun Yashnobod tumani Furqat nomidagi madaniyat va istirohat bog‘ida joylashgan “Ays Avenyu” muz saroyi ana shunday imkoniyatni taqdim etishga qodir.
Ushbu manzilga borganimizda muz maydoni ustida juda ko‘plab yoshlar konkida uchib yurishgan ekan. Ma’lum bo‘lishicha, bu yerda bir vaqtning o‘zida sport ixlosmandlari bilan bir qatorda qishki va murakkab texnik sport turlari bo‘yicha Respublika oliy sport mahorati maktabi tarbiyalanuvchilari ham shug‘ullanishayotgan ekan. Sport maktabi a’zolari bu maskanda ijara asosida mashg‘ulotlar olib borishar ekan.
Muz saroyida yoshu qari birdek shug‘ullanishi mumkin. 12 yoshgacha bo‘lgan bolalar uchun bir soatlik mashg‘ulotlar 20 ming so‘m, yarim soat shug‘ullanish esa 14 ming so‘mga tushadi. 12 yosh va undan kattalar uchun bu summa mos ravishda 30 ming hamda 18 ming so‘m etib belgilangan. Shuningdek bu yerda oylik abonementlar ham joriy etilgan bo‘lib, bu ham aholiga qulaylik yaratadi. Ushbu maskan qish mavsumida har kuni soat 10dan 22ga qadar aholiga xizmat qilib keladi. Ammo havo harorati tashqarida 25 darajadan oshib ketsa, muz maydonini saqlab turish oson emas va shu bois yilning issiq paytida bu maskan o‘z faoliyatini to‘xtatishga majbur bo‘ladi.
Kezi kelganda ta’kidlash kerak, 50x25 o‘lchamli muz maydoni jahon standartlariga mos kelmaydi. Lekin, “Xumo” ko‘p tarmoqli sport-sog‘lomlashtirish majmuasi ishga tushirilgunga qadar bu majmua xalqaro talablarga yaqinroq keladigan yagona maskan sanaladi. Chunki Next savdo majmuasida barpo etilgan muz maydoni o‘lchami bu yerdan ham kichik.
Darvoqe, har kuni kechki mahal “Ays Avenyu” muz saroyida yurtimiz xokkeychilari mashq qilishar ekan. Hozir O‘zbekistonda to‘rtta xokkey jamoasi faoliyat olib bormoqda. Bular – o‘sha biz bilgan “Binokor”, shuningdek “Xumo” (bu jamoada yoshlar jamlanishgan), “Toshkent” va “Sezam” jamoalaridir. Ular ishtirokida joriy yildan boshlab O‘zbekiston chempionatini o‘tkazish rejalashtirilmoqda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
