Fransiyalik mutaxassis ishtirokida master-klass o‘tkazilmoqda
Baho:
+0; -0
Bugun sportning karate turi dunyoda tobora ommalashib bormoqda. Bu jarayonda ushbu sport turi 2020 yili Tokioda o‘tkaziladigan Olimpiya o‘yinlari dasturiga kiritilgani ham muhim omil bo‘lmoqda.
O‘zbekiston Milliy Olimpiya qo‘mitasi hamda O‘zbekiston karate Milliy federasiyasi tomonidan ushbu sport turini yanada rivojlantirish va aholi orasida keng ommalashtirish yo‘lida samarali ishlar amalga oshirilmoqda.
Sir emaski, yosh avlod orasida sportga qiziqishni oshirishda jahon yulduzlari bilan uchrashuvlar, ular ishtirokidagi master-klasslar katta ahamiyatga ega. Shu munosabat bilan O‘zbekiston karate Milliy federasiyasi rahbariyatining taklifiga ko‘ra fransiyalik taniqli mutaxassis Xasin Xaddad yurtimizga keldi.
Arab millatiga mansub Xaddad Fransiyada tug‘ilib o‘sgan. Sportchi sifatida ko‘plab sovrinlarni qo‘lga kiritgan, murabbiylik faoliyatini boshlagach esa bir qator Yevropa va jahon chempionlarini voyaga yetkazgan malakali mutaxassis bugungi kunda Jahon karate federasiyasida yo‘riqchi (instruktor) bo‘lib ishlamoqda.
Faxriy mehmon kecha tunda Islom Karimov nomidagi Toshkent xalqaro aeroportida kutib olindi. Rejaga ko‘ra u yurtimizda milliy terma jamoa a’zolari hamda yosh, iqtidorli karatechilar uchun master-klasslar o‘tkazadi.
Xasin Xaddad bugunning o‘zidayoq yeng shimarib ishga kirishdi. U kunning birinchi yarmida poytaxtimizdagi O‘zbekiston dzyudo federasiyasi sport markazida mamlakatimizning eng iqtidorli karatechilari ishtirokida mashg‘ulotlarni boshlab yubordi.
– Yaqinda Fransiyada o‘tkazilgan nufuzli turnirda janob Xaddad sportchilarimizning chiqishlarini o‘z ko‘zi bilan ko‘rib, ularning salohiyatiga yuqori baho berdi. Faqat ayrim texnik kamchiliklar sportchilarimizga imkoniyatlarini to‘liq namoyon etishga to‘sqinlik qilayotganligini ta’kidlab, iloji bo‘lsa o‘zbekistonlik sportchilar bilan ishlab, ularga o‘z bilim va tajribalarini o‘rgatishga tayyor ekanligini ham bildirdi. Muzokaralar natijasida fransiyalik taniqli mutaxassisni O‘zbekistonga olib kelishga muvaffaq bo‘ldik. Umid qilamanki, Xasin Xaddad ishtirokida o‘tkaziladigan mashg‘ulotlar yurtimiz sportchilarining mahoratlarini yanada oshishiga xizmat qiladi, – dedi O‘zbekiston karate Milliy federasiyasi prezidenti Alamjon Mullayev.
Mashg‘ulotlar yakuniga yetgach, fransiyalik mutaxassisga O‘zbekiston karate milliy federasiyasi prezidenti A.Mullayev hamda vise-prezident K.Odilovlar tomonidan milliy to‘n va do‘ppi taqdim etildi.
Rejaga muvofiq, bugun kunning ikkinchi yarmida janob Xaddad Milliy Olimpiya qo‘mitasiga tashrif buyuradi. Shu o‘rinda ta’kidlash joiz, O‘zbekiston karate Milliy federasiyasi oldiga 2020 yili Yaponiyaning Tokio shahrida o‘tkaziladigan navbatdagi yozgi Olimpiya o‘yinlarida munosib ishtirok etish vazifasi qo‘yilgan. Bu kabi sa’y-harakatlar esa ushbu ezgu maqsadni ro‘yobga chiqarishda muhim omil bo‘lishiga shubha yo‘q.
Otabek Eshmamatov, Muhammad Amin (surat), O‘zA
Kiritilgan sana: 21.02.2019 22:14. O'kildi: 8326 marta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
