Afsonaviy Makarov o‘zbek xokkeychilari haqida qanday fikrda?
Baho:
+0; -0
8 fevral kuni poytaxtimizdagi “Ice City” majmuasida xokkey sporti bo‘yicha tarixiy O‘zbekiston birinchi chempionatiga start berildi.
Musobaqaning ochilish marosimi o‘ziga xos tarzda tashkil etildi. Ta’kidlash kerak, tashkilotchilar O‘zbekiston chempionati bahslarini yuksak saviyada o‘tkazish uchun astoydil harakat qilishgan. E’tiborimizni tortgan jihatlardan biri – musobaqaga xokkey afsonasi rossiyalik Sergey Makarovning taklif etilganidir.
Ehtimol yoshroq sport ishqibozlari bu inson haqida aytarli ma’lumotga ega emasdir, ammo o‘rta yoshli va faxriy muxlislar Makarovning muz ustida qanday karomat ko‘rsatganini yaxshi bilishadi. Sodda qilib aytganda uni millionlar o‘yinidagi Yoxan Kroyff, Mishel Platini yoki Zinedin Zidan kabi charm to‘p ustalari bilan tenglashtirish mumkin. Makarov bilan birga o‘ynagan Larionov-Krutov-Fetisov-Kasatonov beshligini esa o‘tgan asrning 80-90-yillarida to‘xtatib qolishning imkoni bo‘lmagan.
Xokkey bo‘yicha tarixiy O‘zbekiston birinchi chempionatini ochib berish vazifasi ham aynan Makarovga ishonib topshirildi.
“Toshkent” hamda “Binokor” jamoalari uchrashuvidan keyin afsonaviy xokkeychining fikrlari bilan qiziqdik.
- Yoshligimda O‘zbekistonga tez-tez kelib turganman, u vaqtlarda Toshkentda “Yubileyniy” degan arena bo‘lardi va shu yerda xokkey o‘ynaganlarimiz hamon yodimda. Shu bois yurtingizda ko‘plab do‘stlar orttirganman, xokkeychi hamkasblar. Shulardan biri Shukrullo Karimovni ham uzoq yillardan beri yaxshi bilaman. Qachon O‘zbekistonga kelsam u meni kutib olar edi. Yaxshiyamki yurtingizda xokkey sportiga qiziquvchi insonlar bor ekan, shularning sharofati bilan bu yerda yana xokkey sporti qayta jonlandi. Meni birinchi O‘zbekiston chempionatiga chorlaganida taklifni bajonidil qabul qildim. Do‘stim Shukrullo yurtingizda xokkeyni qayta tiklash uchun ancha harakat qilganini ham yaxshi bilaman va o‘z navbatida biz ham unga baholi qudrat yordam berishga harakat qildik. Bugungi sana esa O‘zbekiston xokkey sporti tarixiga zarhal harflar bilan bitiladi. Yurtingizda muz arenalari qancha ko‘p bo‘lsa, xokkey bilan shug‘ullanuvchi yoshlar ham shunchalik ko‘payadi. Va albatta vaqti kelib o‘zbekistonlik xokkeychilar qishki Olimpiya o‘yinlarida qatnashishiga ishonaman.
Hozirgina birinchi O‘zbekiston chempionatining dastlabki o‘yiniga guvoh bo‘ldim. Men uchun yurtingiz xokkeychilarining muz ustidagi chaqqon harakatlari yoqimli syurpriz bo‘ldi. Ochig‘i ulardan bunday o‘yin va texnikani kutmagandim. Agar bu yoshlar to‘g‘ri tarbiyalansa sizlar tez orada jahonda o‘z o‘rningizni topishingiz mumkin. Bilasizmi, men bir necha yil AQShning Kaliforniya shtatida yashaganman. Kaliforniya O‘zbekistondan ham issiq bo‘lishiga qaramay ularda xokkey sporti ancha rivojlangan. Chunki hozir xokkey tom ostida o‘ynalmoqda. Shunday ekan, O‘zbekistonda ham xokkey sportining rivojlanishiga shubha qilmayman, - dedi biz bilan suhbatda xokkey afsonasi Sergey Makarov.
Otabek Eshmamatov suhbatlashdi, O‘zA
Kiritilgan sana: 21.02.2019 22:22. O'kildi: 8646 marta.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
