Oradan 10 yil o‘tib… yoxud 2007 yilning eng yaxshi yosh futbolchilari hozir qayerda?
Baho:
+-1; -0
2007 yilning noyabrida obro‘li jurnal - World Soccer tomonidan jahonning eng istiqbolli 50 nafar yosh futbolchisi aniqlangan va ularning kelajaklari yorqin bo‘lishi taxmin qilingandi.
Mana, oradan 10 yil o‘tdi. Xo‘sh, top-50 ko‘rinishidagi reyting nechog‘li to‘g‘ri chiqdi? Tabiiyki, World Soccer elit ro‘yxatga munosiblarni tanlash barobarida ayrimlarga baho berishda katta xatoga ham yo‘l qo‘ygan.
Chunonchi, bo‘lajak yulduzlar qatorida e’tirof etilgan yigitlarning ba’zilari chindan ham, yuqori darajaga ko‘tarilgan bo‘lsalar, bir guruh futbolchilar «nom-nishonsiz» chetga chiqishdi.
Deylik, o‘sha reytingda 2-o‘rinni egallagan o‘yinchi hattoki, Rossiyada ham to‘p surdi...
Kimlar ishonchni oqlashdi?
Garet BEYL. Uelslik futbolchi 18 yoshida endigina «Tottenxem» safiga qo‘shilgan va asta-sekin asosiy tarkibda maydonga tusha boshlagandi. Eng qizig‘i, «shporlar» Garetga chap qanot himoyachisi sifatida qarashgan.
Keyin haqiqiy parvoz kuzatildi - APLda qahramonliklar, CHLda «Inter»ga qarshi o‘yinda»xet-trik», 100 million yevroli transfer va «Real» bilan behisob sovrinlar...
To‘g‘ri, World Soccer tahlilchilari kelajakni aniq-tiniq ko‘rish xususiyatiga ega bo‘lishganida, Beylni o‘z ro‘yxatlarida 6-o‘rin emas, balki 1 yoki 2-pog‘onaga qo‘yishardi.
Serxio AGUERO. Xabaringiz bordir, argentinalik hujumchi yaqindagina «Manchester Siti» tarixidagi eng yaxshi to‘purarga aylandi. Aytish mumkinki, agar jarohatlar xalaqit bermaganida, Serxio hozirgidan ancha ko‘p gol urardi.
Jurnal xodimlari garchi Agueroni o‘sha reytingning yuqori o‘nligiga kiritgan bo‘lsalarda, ularni ortiqcha maqtash shart emas.
Zero, Aguero 10 yil oldin «Atletiko» uchun gol ura boshlagan va Argentina milliy jamoasida debyutini nishonlashga ham ulgurgandi. Xullas, bunday yigitni e’tiborsiz qoldirish mumkin emasdi.
Anxel DI MARIYA. Haqli ravishda e’tirof etilgan yana bir argentinalik. Anxel «Benfika»da yana 2 yildan keyingina chinakamiga nur sochganini hisobga olsak, World Soccer uning iqtidorini oldindan sezgandek.
Ammo argentinalik yigitcha to‘p bilan shunday hunarlar ko‘rsatardiki, yorqin istiqbolga egaligini bemalol aytish mumkin edi. Deylik, o‘sha vaqtdayoq zargarona to‘p uzatishlarni qoyillatardi. Xullas, tengdoshlari orasida yaqqol ajralib turardi, xuddi Rikardu Kuarejma kabi.
Karim BENZEMA. Fransiyalik hujumchi o‘smirligidayoq «Lion»ning boshlang‘ich tarkibidan joy olib, mavsum davomida 8ta gol urishga erishgandi.
Biroq ekspertlar uni atigi 15-o‘ringa loyiq ko‘rishgan. Bu g‘alati, albatta. Nima bo‘lishidan qat’iy nazar, vaqt hammasini o‘z o‘rniga tushirib qo‘ydi.
Ha, Karimning mahsuldorligi o‘ta yuqori emas, ammo u «Real» hujumidagi eng foydali futbolchilardan biri bo‘lib qolyapti, baribir.
Mesut OZIL. Bu futbolchining ham top-50ga kirgani o‘z-o‘zidan tushunarli. Axir o‘sha vaqt bundesligada chempionlik uchun «Shtutgart» va «Shalke» o‘rtasida kurash borgan.
Mesut esa Gelzenkirxen klubi asosiy tarkibining to‘laqonli vakili sifatidagi ilk mavsumidayoq tajribali futbolchilarga xos harakatlari bilan ko‘zga tashlangandi.
Germaniyalik turk keyinchalik «Verder» safiga qo‘shilib, Bremenda ikki mavsum qoyilmaqom darajada to‘p surdi, JCH-2010da yorqin nur sochganidan keyin esa Madridga ko‘chib o‘tdi. Uning keyingi taqdiri hammaga ma’lum.
Aleksis SANCHES. Chililik yigitcha 18 yoshida Argentina chempionatida «River Pleyt» raqiblari ko‘ngliga g‘ulg‘ula sola boshlagandi.
Oyoqlarida mustahkam turadigan baquvvat va tezkor Aleksis ayniqsa, kuchli zarbalariyu, yuqori texnik salohiyati bilan ko‘zga tashlanib, tez orada Italiyaning «Udineze» klubi e’tiboriga tushdi.
Sanches aynan «A» seriyasidagi bir necha samarali mavsum natijasida yevrofutbolning eng sara yulduzlari qatoriga qo‘shildi hamda «Barselona»dan taklif oldi.
Toni KROOS. Nemis yarim himoyachisi bundan 10 yil oldin «Bavariya»ning birinchi va ikkinchi jamoasi o‘rtasida sarson bo‘lgandi. Futbol masalasida g‘ayrioddiy aql-tafakkurdan bebahra qolmagan Toni barqaror ravishda jamoaning yulduzli tarkibiga talpinib, tahlilchilar nazariga ham tushdi.
Biroq «Bavariya» yigitchani ijara asosida «Bayer»ga yubordi va u aynan Leverkuzenda yuqori saviyada o‘ynashga tayyorligini isbotladi. Shu tariqa 25 million yevro evaziga «Real»ga o‘tgan Kroos Yevropadagi eng kuchli yarim himoyachilardan biriga aylandi.
Xuan MATA. «Real» 19 yoshli Matani «keraksiz»ga chiqargach, u «Valensiya»ga yo‘l oldi va tez orada asli nimalarga qodirligini amalda ko‘rsatdi.
Deylik, o‘sha vaqt klubda murabbiylik qilgan Ronald Kuman faxriy Anguloni zaxirada qoldirib, yosh Mataga ishonch bildirgandi. Natijada iqtidorli yigit ikki David - Vilya va Silva bilan ajoyib bog‘lam hosil qilib, o‘yinni keskin jonlantirdi.
Xullas, Xuan 23 yoshga to‘lgach, «Valensiya»ni katta mablag‘ bilan ta’minlagancha Angliya premyer-ligasini zabt etishga chog‘landi.
Ivan RAKITICh. Xorvatiyalik yigitning faoliyati tilga olingan yulduzlarnikidek yuqori sur’atda rivojlangani yo‘q. Ivan avvaliga «Shalke» asosiy tarkibiga kirishda rosa ter to‘kdi, keyin «Sevilya»da ham o‘z o‘rnini topishda ancha qiynaldi.
26 yoshida esa barcha imtihonlardan muvaffaqiyatli o‘tib, chinakam top-klubda o‘ynash imkoniyatiga ega bo‘ldi. Ha, Rakitich «Barselona»da birinchi raqamli yetakchi emas, ammo asosiy tarkibning barqaror vakili hisoblanadi.
Har holda, 3 yildirki, Kataloniya jamoasiga o‘ziga yarasha yordam beryapti.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
